প্লাষ্টিকে আমাৰ জীৱনত ইমানেই প্ৰভাৱ পেলাইছে যে প্লাষ্টিক অবিহনে আজিৰ পৃথিৱীখন কল্পনাই কৰিব নোৱাৰি ৷ মানুহ প্লাষ্টিকৰ ওপৰত ইমানেই নিৰ্ভৰশীল যে খোৱাপানীৰ বটলৰ পৰা আৰম্ভ কৰি খাদ্য ৰখা টিফিন বাকচটো আৰু প্ৰয়োজনীয় সকলো বস্তুতে প্লাষ্টিক ব্যৱহাৰ কৰি আহিছে ৷
দেখা যায় যে পিয়াহ লাগিলে মানুহে নোচোৱাকৈ বা কোনো পৰীক্ষা নকৰাকৈ যিকোনো ধৰণৰ পানী খায় ৷ সাধাৰণতে বেছিভাগ মানুহেই যেতিয়াই নিজৰ স্বাস্থ্যৰ কথা মনলৈ আহে তেতিয়া তেওঁলোকে বাহিৰত উপলব্ধ প্লাষ্টিকে বটলৰ পানী ক্ৰয় কৰি খায় ৷ যাৰ ওপৰত লিখা থাকে ‘Mineral Water’ ৷
সাধাৰণতে, ভাল মানৰ বুলি দাবী কৰা কোম্পানী এটাৰ ছীল কৰা পানীৰ বটল ২০ টকাত পোৱা যায় ৷ কিন্তু এই বটলত থকা পানী যে আপোনাৰ স্বাস্থ্যৰ বাবে কোনো বৰবিহতকৈ কম নহয়, সেই কথা আপুনি জানেনে ?
শেহতীয়াকৈ, ভাৰতীয় খাদ্য সুৰক্ষা আৰু মানদণ্ড কৰ্তৃপক্ষই (এফ এছ এছ এ আই) প্লাষ্টিকৰ বটলত উপলব্ধ আৰু Mineral Waterক "উচ্চ বিপদজনক খাদ্য শ্ৰেণী"ত ৰখাৰ সিদ্ধান্ত লৈছে ৷ অৰ্থাৎ এতিয়া এই সামগ্ৰীসমূহৰ গুণগত মান নিবিড়ভাৱে নিৰীক্ষণ কৰা হ’ব আৰু এইবোৰ পৰিদৰ্শন কৰি তৃতীয় পক্ষৰ অডিট কৰা হ’ব ৷ FSSAIৰ এই পদক্ষেপে এয়াই প্ৰমাণ কৰিছে যে প্লাষ্টিকৰ বটলত উপলব্ধ পানী মানৱ স্বাস্থ্যৰ পক্ষে ভাবুকি কঢ়িয়াই আনিব পাৰে ৷
গতিকে জানো আহক প্লাষ্টিকৰ বটলত উপলব্ধ পানী কেনেকৈ স্বাস্থ্যৰ বাবে বিপজ্জনক হ’ব পাৰে-
ৰাসায়নিক পদাৰ্থ পানীত দ্ৰৱীভূত হয়
প্লাষ্টিকৰ বটলত পেক কৰা পানীত প্লাষ্টিকত থকা ৰাসায়নিক পদাৰ্থ নিৰ্গত হয়, যি আমাৰ স্বাস্থ্যৰ পক্ষে ক্ষতিকাৰক ৷ বিপিএ (বিচফেনল এ)ৰ দৰে বটলত থকা ৰাসায়নিক পদাৰ্থ, ফ্থালেট একেটা বটলত দীৰ্ঘদিন ধৰি ৰাখিলে পানীত দ্ৰৱীভূত হ’ব পাৰে ৷ এই ৰাসায়নিক পদাৰ্থবোৰ গ্ৰহণ কতৰিলে হৰম’নৰ ভাৰসাম্যহীনতা, কেন্সাৰ আৰু অন্যান্য গুৰুতৰ ৰোগ হ’ব পাৰে ৷ সেয়ে পৰাপক্ষত আমি প্লাষ্টিকৰ বটলত পানী খোৱাটো পৰিহাৰ কৰাটো উচিত ৷
প্ৰয়োজনীয় খনিজ পদাৰ্থৰ অভাৱ
প্ৰাকৃতিক উৎসৰ পৰা অহা পানীত সাধাৰণতে কেলচিয়াম, মেগনেছিয়াম, পটাছিয়াম আদি প্ৰয়োজনীয় খনিজ পদাৰ্থ থাকে, যিবোৰ আমাৰ শৰীৰৰ বাবে অপৰিহাৰ্য ৷ কিন্তু প্লাষ্টিকৰ বটলৰ পানীত এই খনিজ পদাৰ্থৰ অভাৱ হ’ব পাৰে ৷ কাৰণ পানী বিশুদ্ধ কৰাৰ প্ৰক্ৰিয়াত এই পুষ্টিকৰ পদাৰ্থবোৰ নোহোৱা হৈ যায় ৷
মাইক্ৰ’প্লাষ্টিকৰ ভয়াৱহতা
কিছুমান গৱেষণাৰ মতে, প্লাষ্টিকৰ বটলৰ পানীত মাইক্ৰ’প্লাষ্টিক কণা পোৱা যায়, যি আমাৰ স্বাস্থ্যৰ বাবে অতিকৈ ক্ষতিকাৰক ৷ এই সৰু সৰু প্লাষ্টিকৰ কণিকাবোৰ শৰীৰত প্ৰৱেশ কৰি পেট, অন্ত্ৰ আৰু অন্যান্য অংগত জমা হ’ব পাৰে ৷ যাৰ ফলত পাচনতন্ত্ৰৰ সমস্যা, কেন্সাৰ, আৰু হৃদৰোগৰ সৈতে জড়িত সমস্যাৰ সম্ভাৱনা বহুগুণে বৃদ্ধি পাব পাৰে ৷
https://fostac.fssai.gov.in/doc/Water%20&%20Water%20Based%20Beverages.pdf
