গুৱাহাটী, 12 জুন: এটা DSLR কেমেৰাৰে ল’ৰাজনে নিজৰ কেৰিয়াৰৰ প্ৰথমটো খোজ দিছিল আৰু নিৰ্মাণ কৰিছিল সমৰকলা শৈলী কুংফুৰ ওপৰত আধাৰিত এখন ছবি, নাম দিছিল ‘লোকেল কুংফু’ ৷ ছবিখনৰ কেৱল পৰিচালনা কৰাই নহয় নিজৰ খুহুতীয়া অভিনয়ৰ দ্বাৰা দৰ্শকৰ মন জয় কৰিছিল তেওঁ ৷ এই ব্যক্তিগৰাকী আন কোনো নহয় জনপ্ৰিয় অভিনেতা তথা পৰিচালক কেনী বসুমতাৰী ৷ ২০১৩ চনৰ লোকেল কুংফুৰ পিচত ২০১৭ চনত লোকেল কুংফু-২ আৰু এতিয়া এই ছবিখনৰেই সংস্কৰণ ৩ মুক্তি লাভ কৰাৰ পথত ৷
২০২৪ বৰ্ষত মুক্তি পাবলগীয়া কেইখনমান বিশেষ অসমীয়া ছবিৰ ভিতৰত অন্যতম হৈছে "লোকেল কুংফু ৩" ৷ ইতিমধ্যে এই ছবিখনৰ পূৰ্বৰ দুটা সংস্কৰণে দৰ্শকক হহুঁৱাবলৈ কৰা প্ৰয়াসত একেবাৰ ১০০ৰ ভিতৰত ১০০ নম্বৰ পাবলৈ সক্ষম হোৱাৰ লগতে দৰ্শকৰ দৃষ্টি আকৰ্ষণ কৰিবলৈও সক্ষম হৈছে ৷
একেবাৰে কম বাজেটেৰে নিৰ্মাণ কৰাৰ পিচতো "লোকেল কুংফু" ৰ প্ৰথমটো সংস্কৰণ আজিও দৰ্শকে পাহৰিব পৰা নাই ৷ ২০১৩ত মুক্তিপ্ৰাপ্ত এই চিনেমাখন অসমৰ লগতেই উত্তৰ-পূৰ্বাঞ্চলৰ তথা ভাৰতৰে সমৰকলা শৈলী কুংফুৰ ওপৰত আধাৰত নিৰ্মিত এখন ছবি ৷ এটা মাত্ৰ ডি এ এছ লাৰ কেমেৰা আৰু নিজৰ লগতে পৰিয়ালৰ সম্বন্ধীয় ভাতৃ-বন্ধু বৰ্গক অভিনেতা-অভিনেত্ৰী হিচাপে নিৰ্বাচিত কৰি পৰিচালক কেনী বসুমতাৰীয়ে আৰম্ভ কৰিছিল লোকেল কুংফু"ৰ শ্বুটিঙৰ কাম ৷
