হায়দৰাবাদ : গুগলে কৃষ্ণকুমাৰ কুন্নাথক শ্ৰদ্ধাঞ্জলি জ্ঞাপন কৰে শুকুৰবাৰে, যাক সৰ্বসাধাৰণভাৱে কে কে বুলি জনা যায় ৷ তেওঁ এনে এজন ভাৰতীয় নেপথ্য গায়ক যাৰ মনোমোহা কণ্ঠ আৰু ৰোমাণ্টিক গানবোৰে সংগীতৰ ক্ষেত্ৰখনত এক মচিব নোৱৰা ছাপ পেলাইছে । 1968 চনৰ 23 আগষ্টত দিল্লীত জন্মগ্ৰহণ কৰা কে কেৰ সংগীত যাত্ৰা কিৰোৰীমল কলেজত শিক্ষা সম্পূৰ্ণ কৰাৰ পিছত আৰম্ভ হৈছিল ৷ সংগীতৰ প্ৰতি সম্পূৰ্ণকৈ সমৰ্পিত হোৱাৰ আগতে চমুকৈ মাৰ্কেটিঙত প্ৰৱেশ কৰিছিল তেওঁ ।
1994 চনত এটা ডেমো টেপত ৰেকৰ্ডিং কৰি কে কেই সংগীতৰ বাট মুকলি কৰিছিল, যাৰ পিছত তেওঁ অসংখ্য বাণিজ্যিক জিংগল পৰিৱেশন কৰিছিল ৷ ইয়ে তেওঁৰ সুন্দৰ কেৰিয়াৰৰ পথ প্ৰশস্ত কৰিছিল । 1999 চনত হম দিল দে চুকে সনম চলচ্চিত্ৰৰ হৃদয় বিদাৰক গান "তৰপ তৰপ..."ৰ জৰিয়তে তেওঁৰ বলীউডত আত্মপ্ৰকাশ কৰে। একে বছৰতে, তেওঁ তেওঁৰ প্ৰথম একক এলবাম পল মুকলি কৰে, যিয়ে অতি সোনকালে যথেষ্ট জনপ্ৰিয়তা অৰ্জন কৰে । শীৰ্ষ গীত আৰু য়াৰোকে ধৰি এলবামটোৰ গানবোৰ কালজয়ী সংগীত হৈ পৰে, যি প্ৰজন্মজুৰি শ্ৰোতাসকলক মুগ্ধ কৰি আহিছে ।
সমগ্ৰ কেৰিয়াৰত কে কেই উল্লেখনীয় বহুমুখী প্ৰতিভা প্ৰদৰ্শন কৰিছিল, 500ৰো অধিক হিন্দী গীত আৰু 200ৰো অধিক গান তেলুগু, বাংলা, কান্নাড়া আৰু মালয়ালম আদি আঞ্চলিক ভাষাত ৰেকৰ্ডিং কৰিছিল । ইয়াৰ উপৰিও তেওঁ 11 টা ভাষাত প্ৰায় 3500 জিংগল ৰেকৰ্ডিং কৰি ভাৰতৰ অন্যতম প্ৰচুৰ জনপ্ৰিয় প্লেবেক গায়ক হিচাপে নিজকে প্ৰতিষ্ঠা কৰে । তেওঁৰ অৱদানে তেওঁক একাধিক সন্মান প্ৰদান কৰে, য’ত ফিল্মফেয়াৰ বঁটাৰ বাবে ছটা মনোনয়ন আৰু দুটা ষ্টাৰ স্ক্ৰীণ বঁটাৰ বাবে মনোনয়ন অন্তৰ্ভুক্ত হৈ আছে ।
2022 বৰ্ষৰ 31 মে’ত কলকাতাত এক অনুষ্ঠান পৰিৱেশনৰ অলপ পিছতে অকস্মাতে অসুস্থ হৈ পৰিছিল কে কে ৷ সেয়াই আছিল তেওঁৰ শেষ গান শেষ অনুষ্ঠান ৷ অসুস্থ হৈ পৰাৰ কিছু সময়ৰ পিছতে শেষ নিস্বাস ত্যাগ কৰিছিল এইগৰাকী জনপ্ৰিয় গায়কে ৷ সেইদিনাই ভাৰতবৰ্ষই হেৰুৱাইছিল এগৰাকী প্ৰৱল প্ৰতিভাধৰ সংগীতশিল্পীক ৷ ভাৰতীয় সংগীত ক্ষেত্ৰখনৰ বাবে যি আছিল এক অপূৰণীয় ক্ষতি । ভাৰতীয় সংগীত জগতলৈ তেওঁৰ অৱদানৰ প্ৰতি সন্মান জনাই তেওঁ অন্তিমবাৰৰ বাবে সংগীত পৰিৱেশন কৰা চহৰখনত এটা প্ৰতিমূৰ্তি স্থাপন কৰা হয় । কে কে সদায় ভাৰতৰ আটাইতকৈ প্ৰতিভাশালী আৰু প্ৰিয় শিল্পী হিচাপে স্মৰণীয় হৈ থাকিব ।
লগতে পঢ়ক : এমাজন প্ৰাইমত টপ-১০ ৰ শীৰ্ষত অসমৰ পৰিচালকৰ হিন্দী ছবি কুকি
