নলবাৰী, 4 ছেপ্টেম্বৰ : অসম জাতীয়তাবাদী যুৱ-ছাত্ৰ পৰিষদ, নলবাৰী জিলা সমিতিৰ উদ্যোগত অনুষ্ঠিত ষষ্ঠদশ বাৰ্ষিক ভৱেন বৰুৱা সদৌ অসম শিশু নাট প্ৰতিযোগিতাৰ মঙলবাৰে আছিল দ্বিতীয়টো দিন । অসমৰ স্বনামধন্য নাট্যকাৰ, পৰিচালক, অভিনেতা তথা চিত্ৰশিল্পী প্ৰয়াত ভৱেন বৰুৱাৰ স্মৃতি সজীৱ কৰি ৰখা আৰু ভৱিষ্যত প্ৰজন্মৰ কণ কণ শিশুসকলক উৎসাহিত কৰাৰ উদ্দেশ্যে তিনিদিনীয়াকৈ অনুষ্ঠিত কৰা হৈছে এই প্ৰতিযোগিতাৰ ।
প্ৰথম দিনা পতাকা উত্তোলন, শ্বহীদ তৰ্পণ, শিল্পী সাহিত্যিকলৈ শ্ৰদ্ধাঞ্জলি জনোৱাৰ পিছত দুপৰীয়া 2 বজাৰ পৰা নাট প্ৰতিযোগিতা আৰম্ভ হয় আৰু মঙলবাৰে আবেলি 4 বজাত ভৱেন বৰুৱা বঁটাপ্ৰাপক শিল্পীক শুভেচ্ছা জনাই দ্বিতীয় দিনৰ নাট প্ৰতিযোগিতা উদ্বোধন কৰে অসমীয়া প্ৰতিদিন কাকতৰ সহযোগী সম্পাদক অচ্যুত পাটোৱাৰীয়ে । উক্ত সভাতেই অসমৰ ভ্ৰাম্যমাণ তথা চলচ্চিত্ৰ জগতৰ বলিষ্ঠ অভিনেত্ৰী ৰীণা বৰাক ভৱেন বৰুৱা সোঁৱৰণী বঁটা 2024 প্ৰদান কৰে পৰিষদৰ কেন্দ্ৰীয় সমিতিৰ সভাপতি পলাশ চাংমাইয়ে ।
এক সাংস্কৃতিক শোভাযাত্ৰাৰে যুৱ ছাত্র পৰিষদৰ নেতা-কৰ্মীয়ে অভিনেত্ৰী ৰীণা বৰাক নলবাৰী নাট্যমন্দিৰলৈ আদৰি আনে । তাৰ পিছতে প্ৰদান কৰা হয় ভৱেন বৰুৱা বঁটা 2024 । বঁটাটিত আছে এখন চেলেং, স্মাৰক, জাপি, শৰাই, মানপত্ৰ আৰু নগদ ধন । বঁটাটি গ্ৰহণ কৰি আৱেগিক হৈ পৰে অভিনেত্ৰী ৰীণা বৰা । বঁটাটি তেওঁক প্ৰদান কৰাত আবেগিক, বাকৰুদ্ধ হোৱাৰ লগতে এক বিৰল মুহূৰ্তত উপনীত হোৱা বুলি সাংবাদিকৰ আগত মত প্ৰকাশ কৰে অভিনেত্ৰীগৰাকীয়ে । তেওঁ অসম জাতীয়তাবাদী যুৱ ছাত্ৰ পৰিষদ নলবাৰী জিলা সমিতিক আন্তৰিক ধন্যবাদ আৰু কৃতজ্ঞতা জ্ঞাপন কৰে ।
আনহাতে বৰ্তমান ভ্ৰাম্যমাণ থিয়েটাৰত অতিৰঞ্জিত দৃশ্য দেখুৱাবলৈ গৈ বিভিন্ন অঘটন হোৱা পৰিলক্ষিত হৈছে । সেই সন্দৰ্ভত ৰীণাই বৰাই কয়, "এয়া সময়ৰ পৰিৱৰ্তন । আগৰ দিনত ভ্ৰাম্যমাণ বেলেগ আছিল, এতিয়া বেলেগ । কিছুমান থিয়েটাৰ ব্যৱসায়ীক দৃষ্টিভংগীৰে আগবাঢ়িব খুজিছে । এয়া সময়ৰ পৰিবৰ্তন ৷" উক্ত অনুষ্ঠানত উপস্থিত থাকে যুৱ ছাত্র পৰিষদৰ কেন্দ্ৰীয় সমিতিৰ সভাপতি পলাশ চাংমাই । পলাশ চাংমাইয়ে অসম জাতীয়তাবাদী যুৱছাত্র পৰিষদ নলবাৰী জিলা সমিতিয়ে প্ৰতি বছৰে লৈ অহা এই পদক্ষেপৰ শলাগ লয় । উক্ত অনুষ্ঠানৰ অন্তত সাংবাদিকৰে হোৱা সাক্ষাৎকাৰত পলাশ চাংমাইয়ে অসমৰ প্ৰতিষ্ঠানসমূহত বেনাৰ-পোষ্টাৰসমূহ অসমীয়া ভাষাত লিপিবদ্ধ কৰাৰ দাবী তোলে ।
অসমীয়া ভাষাটি জীয়াই ৰাখিবলৈ অসমৰ চৰকাৰী কাৰ্যালয়সমূহত অসমীয়া ভাষাতো প্ৰয়োগ নকৰা কাৰণে সময়ে সময়ে বিশৃংখলবোৰ আহে বুলি উল্লেখ কৰে চাংমাইয়ে । অসমৰ চৰকাৰী কাৰ্যালয়সমূহৰ লগতে অতিকৈ জৰুৰী কাৰ্যালয়সমূহত অসমীয়া ভাষাৰ প্ৰচলন কৰিবলৈ চৰকাৰক আহ্বান জনায় পলাশ চাংমাইয়ে । আনহাতে নাট উদ্বোধনী আৰু বঁটা প্ৰদান অনুষ্ঠানত বিশিষ্ট চিকিৎসক ডাঃ শুভ্ৰকিংকৰ গোস্বামী, প্ৰদূষণ নিয়ন্ত্ৰণ বোৰ্ডৰ অধ্যক্ষ অৰূপ কুমাৰ মিশ্ৰও উপস্থিত থাকে । জানিব পৰা মতে এইবাৰ সমগ্ৰ অসমৰ পৰা অভিলেখ সংখ্যক 38 টা শিশু নাট্যদলে এই নাট প্ৰতিযোগিতাত অংশগ্ৰহণ কৰিছে ।
লগতে পঢ়ক : যশস্বী অভিনেত্ৰী ৰীণা বৰালৈ 2024 বৰ্ষৰ ভবেন বৰুৱা বঁটা ঘোষণা - Bhaben Barua award 2024
