নিউজ ডেস্ক : ওদালগুৰি জিলাৰ টংলাত সংঘটিত চাঞ্চল্যকৰ হত্যাকাণ্ডই জোকাৰি গৈছে সমগ্ৰ ৰাজ্য । দুটিকৈ শিশুৰ মৃতদেহ উদ্ধাৰৰ পিছতেই আটক কৰা হয় তেওঁলোকৰ সতীয়া ভাতৃক । আৰক্ষীয়ে সম্প্ৰতি অপৰাধৰ লগত জড়িত অস্ত্ৰ জব্দ কৰি প্ৰমাণ সংগ্ৰহ কৰি আছে । আৰক্ষী সঞ্চালক প্ৰধান জি পি সিঙেও টুইট কৰি এই কথা সদৰী কৰে ।
ইয়াৰ পিছতে বিটিআৰৰ আইজিপি বিবেকৰাজ সিং আৰু ওদালগুৰি আৰক্ষী অধীক্ষক পুস্কিন জৈনে সংবাদমেল সম্বোধন কৰি সদৰী কৰে ঘটনাৰ কিছু তথ্য ।
Reference murder of two young boys in Tangla Udalguri - the accused, who is related to the victims has been detained by police and the weapon of offence has been seized and evidence being collected per procedure. IGP BTR and SP Udalguri would brief the media in detail about the…
— GP Singh (@gpsinghips) December 21, 2024
আইজিপি বিবেকৰাজ সিঙে ঘটনা সন্দৰ্ভত কয়, "পিতৃৰ পৰা অৱহেলাৰ বাবে হত্যাৰ বলি হোৱা দুই কিশোৰৰ সতীয়া ভাতৃ নীৰজ শৰ্মাৰ মনত সৃষ্টি কৰিছিল তীব্ৰ ঘৃণাৰ । ১৮ বছৰৰ উৰ্দ্ধৰ নীৰজে শিক্ষাগ্ৰহণ কৰি আছিল পঞ্জাবত । মাতৃয়ে পঞ্জাৱত কাম কৰাৰ বাবে মাতৃৰ সৈতেই আছিল নীৰজ । দুবছৰ পূৰ্বে টংলালৈ অহা নীৰজে বৰ্তমান টংলা কলেজত ৰাজনীতি বিজ্ঞানৰ স্নাতক প্ৰথম বৰ্ষত অধ্যয়ণৰত ।"
আৰক্ষী বিষয়াগৰাকীয়ে লগতে কয়, "দুবাৰকৈ বিবাহ পাশত আবদ্ধ হৈছিল অভিযুক্ত নীৰজ শৰ্মাৰ পিতৃ মহেন্দ্ৰ শৰ্মা । মহেন্দ্ৰ শৰ্মা পেচাত এজন গাড়ীচালক । নীৰজ তেওঁৰ প্ৰথমা পত্নীৰ সন্তান আছিল । দ্বিতীয়া পত্নী গৌৰৱ আৰু কিশোৰৰ সৈতে বাস কৰিছিল । নীৰজৰ মাতৃৰ সৈতে আছে এগৰাকী ভগ্নীও ।"
উল্লেখ্য যে, শনিবাৰে পুৱা টংলাত নৈৰ পাৰৰ হাবিৰ মাজত উদ্ধাৰ হয় দুই ছাত্ৰৰ মৃতদেহ । মৃতদেহ দুটা একেটা পৰিয়ালৰে ক্ৰমে পঞ্চম আৰু ষষ্ঠ শ্ৰেণীৰ ছাত্ৰ দুই ভাতৃ আছিল । ইয়াৰ পাছতেই এই নৃশংস হত্যাকাণ্ডক লৈ ৰাজ্যজুৰি তীব্ৰ চাঞ্চল্যৰ সৃষ্টি হয় ।
শুকুৰবাৰৰ পুৱাৰ পৰা নিৰুদ্দেশ হৈ আছিল ককাই-ভাই । আন দিনাৰ দৰেই পুৱা ঘৰৰ পৰা বিদ্যালয়লৈ ওলাই গৈছিল গৌৰৱ আৰু কৌশিক নামৰ দুই ভাই ৷ তাৰ পিছৰে পৰা দুয়ো নিৰুদ্দেশ হৈ আছিল ।
