দৰ্শকৰ মন হৰিবলৈ প্ৰস্তুতি চলোৱাত ব্যস্ত প্ৰস্তুতি পৰাশৰ - Abahan Theatre

Abahan Theatre 2024-25: আকৌ দৰ্শকক মন্ত্ৰমুগ্ধ কৰিবলৈ সাজু অসমৰ অন্যতম আগশাৰীৰ ভ্ৰাম্যমাণ নাট্যদল আৱাহন থিয়েটাৰ । ইতিমধ্যে দৰ্শকৰ মাজলৈ আগবঢ়াই দিয়া হৈছে থিয়েটাৰখনৰ প'ষ্টাৰ, প্ৰম' । ইয়াৰ মাজতে নীলাভ নীতা আৰু নীল আকাশৰ কণ্ঠৰে প্ৰথমটো গীতৰ শ্বুটিঙত ব্যস্ত অভিনেত্ৰী প্ৰস্তুতি পৰাশৰ ।

গুৱাহাটী,২৫ জুন: প্ৰতিটো বৰ্ষতে নতুন নতুন নাট্যশৈলীৰে অসমৰ ভ্ৰাম্যমাণপ্ৰেমীক মুগ্ধ কৰি আহিছে অসমৰ অন্যতম তথা আগশাৰীৰ নাট্যদল আৱাহন থিয়েটাৰে । চলিত নাট্যবৰ্ষৰ বাবে সাজু হৈছে ৰাজ্যৰ প্ৰতিটো নাট্যগোষ্ঠী । ২০২৩-২৪ ৰ নাট্যবর্ষত তিনিখন ব্যতিক্ৰমী নাটকৰে দৰ্শকৰ মন জয় কৰিবলৈ সক্ষম হোৱা আৱাহন থিয়েটাৰ সাজু হৈছে অহাটো নাট্যবৰ্ষৰ বাবে ।

এই সন্দৰ্ভত আৱাহন থিয়েটাৰৰ অভিনেত্ৰী তথা প্ৰস্তুতি পৰাশৰে কয়, "এইবর্ষও আমি তিনিখন ব্যতিক্ৰমী নাটেৰে সাজু হৈছো । নাট তিনিখনৰ এখন হৈছে অভিজিৎ ভট্টাচাৰ্যৰ 'মইনা কুশলে আছনে', 'মেডাম মেনকা', 'লেডী ম্যাকবেথ' । ইতিমধ্যে এই বর্ষৰ তিনিখন নাটৰ ভিতৰৰ অন্যতম 'মইনা কুশলে আছনে' নাটখনৰ প্ৰম' কেইদিনমান পূৰ্বে সামাজিক মাধ্যমত মুক্তি দিয়া হয় । এই সন্দৰ্ভত এক প'ষ্ট দি অভিনেত্ৰী প্ৰস্তুতি পৰাশৰে উল্লেখ কৰে, "কিছু হৃদয়স্পৰ্শী কাহিনী, কিছু কৰুণ দৃশ্যাংশৰ সমাহাৰ ঘটিব এইবৰ্ষত আৱাহনৰ মঞ্চত, যেতিয়া 'মইনা কুশলে আছনে' নাটখনিয়ে ভুমুকি মাৰিব । বিগত বৰ্ষৰ 'অৰ্ধাঙ্গিনী' নাটখনিৰ ব্যাপক জনপ্ৰিয়তাৰ পিছত পুনৰবাৰ দৰ্শকৰ মাজলৈ আহি আছে এই বৰ্ষৰ অন্য এখনি পৰিয়ালকেন্দ্ৰিক নাট 'মইনা কুশলে আছনে" ।