ধেমাজি : ধেমাজিত চলিছে নাটকৰ মহাৰণ ৷ শ্ৰীকৃষ্ণ ৰাস মহোৎসৱৰ উছাহ ম্লান পৰাৰ লগে লগে ধেমাজিত প্ৰাক্ শীতৰ সন্ধিয়া নাটকৰ মহাৰণ আৰম্ভ হৈছে ৷ উৎকণ্ঠা বাঢ়িছে ধেমাজিৰ নাট্যপ্ৰেমীৰ মাজত ৷ সদৌ অসম ভিত্তিত পদ্মনাথ গোহাঞিবৰুৱা 47 সংখ্যক নাট প্ৰতিযোগিতাৰ আৰম্ভণি হয় দেওবাৰে ৷ দেওবাৰৰ পৰা আৰম্ভ হোৱা এই নাট প্ৰতিযোগিতা মঙলবাৰলৈকে চলিব ৷ প্ৰথমদিনা শিশু নাট প্ৰতিযোগিতাত 6 খনকৈ নাটক মঞ্চস্থ কৰা হয় ৷ সোমবাৰে বিশ্বনাথ, মঙলদৈ আদি ঠাইৰ পৰা বিভিন্ন দলে 5 খন নাটক মঞ্চস্থ কৰে ৷ অন্তিম দিনা অৰ্থাৎ মঙলবাৰে 12 খনকৈ নাটক মঞ্চস্থ হোৱাৰ কথা আছে ৷
সদৌ অসম পদ্মনাথ গোহাঞিবৰুৱা 47 সংখ্যক নাট প্ৰতিযোগিতাৰ উন্মোচনী অনুষ্ঠানত আয়োজক সমিতিৰ স্মৃতিগ্ৰন্থ ‘নাট্য প্ৰজ্ঞা’ উন্মোচন কৰা হয় ৷ স্মৃতিগ্ৰন্থখন উন্মোচন কৰে মিচিং স্বায়ত্তশাসিত পৰিষদৰ মুখ্য কাৰ্যবাহী সদস্য পৰমানন্দ চায়েঙীয়াই । ধেমাজিৰ ৰাজহুৱা প্ৰেক্ষাগৃহত চলিছে 47 সংখ্যক সদৌ অসম পদ্মনাথ গোহাঞিবৰুৱা সোঁৱৰণী একাংক নাট প্ৰতিযোগিতাৰ মহাৰণ ৷
দ্বিতীয় দিনা সন্ধিয়া অনুষ্ঠিত হোৱা মুকলি সভাত ধেমাজিৰ সমাজ জীৱনলৈ অৱদান আগবঢ়াই অহা লোকশ্ৰী বঁটা প্ৰাপক বিমলা গগৈ বৰগোহাঁই আৰু শিক্ষাবিদ পুনেশ্বৰ বৰগোহাঁইক বিশেষভাৱে সম্বৰ্ধনা জনোৱা হয় ৷ এই অনুষ্ঠানত উপস্থিত থাকে AJYCP ৰ সম্পাদক ৰাতুল বৰগোহাঁই, আটাছুৰ উপ-সভাপতি মনোজ গগৈকে ধৰি ভালে সংখ্যক বিশিষ্ট ব্যক্তি ।
উল্লেখ্য যে, বিভিন্ন জিলাৰ পৰা অহা আগশাৰী নাট্যদলে উৎকৃষ্ট নাটক প্ৰদৰ্শন কৰিছে ৷ সেয়ে বৰ্ণাঢ্য কাৰ্যসূচীৰে অনুষ্ঠিত হোৱা 47 সংখ্যক সদৌ অসম পদ্মনাথ গোহাঞিবৰুৱা সোঁৱৰণী নাট প্ৰতিযোগিতাৰ উদযাপন সমিতিয়ে নাট্যপ্ৰেমী ৰাইজৰ সহায় সহযোগিতা আৰু উপস্থিতি কামনা কৰিছে ৷
লগতে পঢ়ক : 'ৰামায়ণ'ৰ ৰাম-সীতাৰ উপস্থিতিৰে নলবাৰী ৰাসৰ শুভাৰম্ভণি
