গুৱাহাটী, 14 আগষ্ট: নতুন নাট্যবর্ষৰ বাবে সাজু ৰাজ্যৰ প্ৰতিটো আগশাৰীৰ নাট্যদল । প্রতিটো নাট্যদলৰে এতিয়া চলি আছে অন্তিম পৰ্যায়ৰ আখৰা । চলিত মাহতে মঞ্চস্থ হ’ব বহু কেইখন নাটক । সাম্প্রতিক সময়ত বহু বিতৰ্কৰ অন্তত অৱশেষত ভ্রাম্যমাণ নাট্যক্ষেত্রৰ সুপৰিকল্পিত আৰু সু-পৰিচালিত নাট্যদল হিচাপে পৰিগণিত হৈছে সুভাষ দাসৰ দ্বাৰা প্রযোজিত নাট্যদল ইতিহাস থিয়েটাৰ ।
বিগত প্রতিটো বর্ষত ইতিহাস থিয়েটাৰৰ নাটকৰ প্রতি দর্শকে দেখুৱাই অহা সহাঁৰিৰ পৰিপ্রেক্ষিতত এইবাৰ আন এক বিগ বাজেটৰ প্রস্তুতি সম্পূর্ণ কৰি তুলিছে নাট্যদলটোৱে । চলিত নাট্যবৰ্ষত ইতিহাস থিয়েটাৰে মঞ্চস্থ কৰিব তিনিখনকৈ ভিন্নস্বাদৰ নাটক ।
নাট্যকাৰ অভিজিৎ ভট্টাচাৰ্যৰ তিনিখনকৈ নাট ক্ৰমে 'জুয়ে পোৰা মানুহ', 'মহাৰাজ' আৰু 'মহাবীৰ লাচিত' দৰ্শক মাজলৈ আহিবলৈ ইতিমধ্যে সাজু হৈছে । নাট্যকাৰ অভিজিৎ ভট্টাচার্যই ইতিহাস থিয়েটাৰৰ প্ৰথম নিশাৰ বাবে ৰচনা কৰা 'জুয়ে পোৰা মানুহ' নাটখন এখনি বিপ্লৱী চেতনাসমৃদ্ধ নাট ৷ লগতে পিতৃ-কন্যাৰ এক হৃদয়স্পর্শী কাহিনীৰে এইবেলি নাট্যদলটোৱে মঞ্চস্থ কৰিব- 'মহাৰাজ' । ইয়াৰোপৰি লাচিত বৰফুকনৰ ৪০০ বছৰীয়া জয়ন্তী উপলক্ষে এইবাৰ ইতিহাস থিয়েটাৰে মঞ্চস্থ কৰিব 'মহাবীৰ লাচিত' নামৰ নাটকখন ।
ইফালে সুদীৰ্ঘ ৬টা বছৰৰ অপেক্ষাৰ অন্তত চলিত নাট্যবৰ্ষত ইতিহাস থিয়েটাৰৰ মঞ্চত দেখিবলৈ পোৱা যাব অভিনেতা যতীন বৰাক । লগতে অভিনয় কৰিব- শর্মিষ্ঠা চক্রৱর্তী, আশা ৰিয়া ফুকন, অর্চনা বৰা, বিপুল বৰা, চন্দন বৰা, মুহি বৰা, গুঞ্জন চৌধুৰী, চম্পক মেধি, পার্থ কলিতা, মানস শইকীয়া, ছায়ামণি কাশ্যপ আদিয়ে ।
নাটকেইখনৰ আৱহ সংগীত পৰিচালনা কৰিছে অজয় ফুকন আৰু দীপক বৰুৱাই । নাট্যদলটোৰ সহঃ প্রযোজকৰ দায়িত্বত অঞ্জনজ্যোতি দাসৰ লগতে সম্পাদকৰ দায়িত্ব বহন কৰিব জ্যেষ্ঠ সম্পাদক ৰঞ্জিত দত্তই । অহা ১৬ আগষ্টৰ পৰা মির্জা ছোৱালী হাইস্কুল ফিল্ডত নাট্যযাত্ৰাৰ পাতনি মেলি চলিত বৰ্ষত ৰাইজৰ মাজলৈ নাটক কেইখন ওলাই আহিব বুলি জানিবলৈ দিয়ে প্রযোজক সুভাষ দাসে ।
আনহাতে লাচিত বৰফুকনক বিকৃত ৰূপত উপস্থাপন কৰাৰ অভিযোগ উত্থাপনৰ পিছত এতিয়া মঞ্চত ইতিহাস থিয়েটাৰ গোষ্ঠীয়ে কিদৰে নাটকখনক উপস্থাপন কৰে সেয়াহে লক্ষণীয় হ’ব ৷ বহু বিতৰ্কৰ পিছতো যতীন বৰাক মহাবীৰ লাচিত বৰফুকনৰ চৰিত্ৰত দৰ্শকে গ্ৰহণ কৰিব নে নাই সেয়া ইতিহাস থিয়েটাৰ গোষ্ঠীৰ বাবে এক চিন্তাৰ বিষয় হৈ পৰিছে ৷
