গুৱাহাটী : অসমবাসীৰ বাবে এক সুখবৰ ৷ অসম তথা উত্তৰ-পূৰ্বাঞ্চলৰ এটি হৃদয়স্পৰ্শী কাহিনীৰ আধাৰত জলীউড আৰু বলীউডৰ এদল অভিনেতা-অভিনেত্ৰীক লৈ নিৰ্মাণ কৰা এখন হিন্দী ছবি ‘কুকি’ বৰ্তমান উপলব্ধ অটিটি প্লেটফৰ্ম ‘এমাজন প্ৰাইম’ত ৷ অ’টিটি প্লেটফৰ্মটোত উপলব্ধ হোৱাৰ ঠিক এমাহৰ ভিতৰতেই ছবিখনিৰ প্ৰতি দৰ্শকৰ সঁহাৰিয়ে উৎসাহিত কৰি তুলিছে নিৰ্মাতা গোষ্ঠীটোক ৷
নিৰি মিডিয়া (অ পি চি) প্ৰাইভেট লিমিটেডৰ বেনাৰত নিৰ্মাণ কৰা ছবিখন অসমত থাকি ডাঙৰ-দীঘল হোৱা এগৰাকী অনা-অসমীয়া কিশোৰীৰ জীৱনগাঁথাক কেন্দ্ৰ কৰি ঘূৰি থাকে ৷ কিশোৰীগৰাকীৰ প্ৰেম, জীৱন সংগ্ৰাম তথা বিভিন্ন প্ৰত্যাহ্বানমূলক পৰিস্থিতি ছবিখনত উপস্থাপন কৰা হৈছে ৷ এই ছবিখনৰ পৰিচালনা প্ৰণৱ জে ডেকাৰ আৰু প্ৰযোজনা কৰিছে ড৹ জোনমণি দেৱী খাউণ্ডে ।
লগতে পঢ়ক : ‘কুকি’ৰ এটা শ্বটৰ পিচত কিয় এঘণ্টা কান্দিছিল অভিনেত্ৰী ৰিতিশাই - Kooki
ছবিখনত অসমীয়া কলা-সংস্কৃতিৰ কেবাটাও উপাদান সংযোজিত কৰাৰ লগতে ‘কুকি’ নামৰ এগৰাকী ১৬ বছৰীয়া কিশোৰীৰ দুখজনক যাত্ৰা দেখুওৱা হৈছে, যাৰ বাবে ছবিখন দৰ্শকৰ কাষ চাপিছে । ‘কুকি’ৰ জীৱন আৰু সপোনবোৰ ছিন্ন-ভিন্ন হৈ পৰে যেতিয়া তাই এক নিৰ্মম দলবদ্ধ ধৰ্ষণৰ বলি হয় ৷ আদালতৰ ৰায়দানক শ্ৰদ্ধা জনাই যদিও তাইৰ ক্ষেত্ৰত হোৱা দলবদ্ধ ধৰ্ষণৰ ন্যায়ৰ সমাধান বহু দূৰত যেন অনুভৱ কৰে কুকিয়ে ৷ কিয়নো এতিয়াও ধৰ্ষণৰ দৰে জঘন্য অপৰাধক হিংসুক তথা জঘন্য অপৰাধ হিচাপে গণ্য কৰি শাস্তি বিহা নহয় অথবা ই আইনৰ গণ্ডীলৈ তেনেদৰে অহা নাই ৷ এনে এক কাহিনীৰ আধাৰত নিৰ্মাণ কৰা ছবিখনি সমগ্ৰ দেশত মুক্তি দিয়াৰ পাছত পৰৱৰ্তী সময়ত অটিটি প্লেটফৰ্ম এমাজন প্ৰাইমত মুক্তি দিয়া হয় ৷
ছবিখনি এমাজন প্ৰাইমত মুক্তি দিয়াৰ এমাহৰ ভিতৰতে বৰ্তমানলৈকে ১ কোটিৰো অধিক লোকে ছবিখনি উপভোগ কৰি একপ্ৰকাৰে অভিলেখ গঢ়ে ৷ সেই অনুসৰি ‘কুকি’ ছবিখনিয়ে এমাজন প্ৰাইমৰ শীৰ্ষ ১০ খন ছবিৰ তালিকাত প্ৰথম স্থানত থাকিবলৈ সক্ষম হৈছে ৷
ছবিখনত অভিনয় কৰিছে বলীউডৰ লগতে বলীউডত প্ৰতিষ্ঠিত কেবাগৰাকীও অসমৰ শিল্পীয়ে ৷ ৰিতিশা খাউণ্ড, ৰাজেশ টেইলাং, দীপান্বিতা শৰ্মা, ৰিতু শিৱপুৰী, দেৱলীনা ভট্টাচাৰ্য, বোধিসত্ব শৰ্মা, কমল লোচন, বিভূতি ভূষণ হাজৰিকা, প্ৰীতি কংকণা, ৰঞ্জীৱ লাল বৰা আৰু বহুতো শিল্পীক এই ছবিখনত দেখা গৈছে ৷
‘কুকি’ৰ নাম ভূমিকাটোত অভিনয় কৰা ৰিতিশা খাউণ্ডৰ সাহসী আৰু প্ৰত্যাহ্বানমূলক সাৱলীল অভিনয়ে তেওঁলৈ বৰ্তমান বলীউডৰ কেবাটাও শীৰ্ষ পৰ্যায়ৰ ছবি নিৰ্মাতা প্ৰতিষ্ঠানৰ ‘অফাৰ’ কঢ়িয়াই আনিছে বুলি জানিবলৈ দিয়ে ছবিখনৰ প্ৰযোজক তথা পৰিচালকে ।
উল্লেখ্য যে, ছবিখনিৰ গীতসমূহত কণ্ঠদান কৰিছে বলীউডৰ কণ্ঠশিল্পী সুনিধি চৌহান, মহম্মদ ফেইজ, দিব্যা কুমাৰ আৰু অসমৰ কৃত্তিকা শৰ্মাই ৷ উল্লেখ্য যে, চলিত বৰ্ষৰ ‘কাঁ চলচিত্ৰ মহোৎসৱ’ ত প্ৰদৰ্শিত হৈছিল ছবিখন ।
লগতে পঢ়ক : শিহৰণকাৰী ঘটনা এটাৰ পাচত ভুক্তভোগীৰ জীৱন কেনেদৰে আগবাঢ়ে ? - Kooki hindi movie
