গুৱাহাটী, 10 ছেপ্টেম্বৰ : এটা DSLR কেমেৰা, কেইটামান টকা, পৰিয়ালৰ ভাতৃৰ লগতে কেইগৰাকীমান বন্ধুৰ সৈতে লগ লাগি কেনি বসুমতাৰীৰ পৰিচালনাৰে আৰম্ভ হৈছিল “লোকেল কুংফু 1” ৰ নিৰ্মাণৰ কাম । এয়া আজিৰ পৰা কেইবছৰমান পূৰ্বৰ কথা । “লোকেল কুংফু 1” ক দৰ্শকে দিয়া মৰমৰ পাছত নিৰ্মাণ কৰা হৈছিল “লোকেল কুংফু 2” । সমৰকলা আৰু হাস্যৰসধৰ্মী এই ছবি দুখনে দৰ্শকৰ পৰা ব্যাপক সঁহাৰি লাভ কৰা পাছত চলিত বৰ্ষৰ 5 ছেপ্টেম্বৰত মুক্তিলাভ কৰে নতুন অসমীয়া ছবি “লোকেল কুংফু 3” এ ।
ছবিখনৰ সন্দৰ্ভত ই টিভি ভাৰতৰ সৈতে হোৱা এক সাক্ষাৎকাৰত ছবিখনৰ সম্পৰ্কে বহু কথা জনালে টীম লোকেল কুংফু 3 এ । "বিদুৰভাইৰ দৰে চিনেমাই আমাৰ বাবে প্ৰতিযোগিতাৰ সৃষ্টি নকৰে, পথহে দেখুৱাই", এই ভাষ্য কেনী বসুমতাৰীৰ ৷
পৰিচালক কেনি বসুমতাৰীৰ ভাষ্য
“ৰাইজ আহক ছবিখন উপভোগ কৰক । ছবিখনৰ প্ৰতি ৰাইজৰ যি সঁহাৰি সেয়া দেখি বৰ ভাল লাগিছে । জ্যেষ্ঠৰ পৰা কণমানি শিশুলৈকে সকলোৱে যি সঁহাৰি দিছে সেয়া বৰ ভাল লাগিছে । আমি কিছুমান ছবিগৃহত দৰ্শকে গম নোপোৱাকৈ বহি থাকো আৰু দৰ্শকে যেতিয়া ছবিখনৰ শেষত হাত চাপৰি বজাই সেই অনুভৱ সুকীয়া ৷”
“লোকেল কুংফু” ৰ টীম এতিয়া ডাঙৰ হৈছে
কেনি বসুমতাৰীৰ প্ৰথম ছবি “লোকেল কুংফু 1” ৰ টীম এতিয়া ডাঙৰ হৈছে । “লোকেল কুংফু 3” ত পুৰণি চৰিত্ৰসমূহৰ লগতে এইবাৰ চাৰ্লিৰ প্ৰেয়সীৰ চৰিত্ৰত ৰিম্পী দাস, দুলু তানসেনৰ বিগ বছৰ চৰিত্ৰত ৰোহন দাস, ছবিখনৰ নতুন খলনায়কৰ ৰূপত জাভেদ আখটাৰ আৰু ৰুবুল বড়োৱে অভিনয় কৰিছে ।
লোকেল কুংফুৰ টীমটোৰ সন্দৰ্ভত পৰিচালকগৰাকীয়ে কয়, “টীমটো ডাঙৰ হ'বই লাগিব । কাৰণ আমি ডাঙৰ পৰ্যায়ত ছবি নিৰ্মাণ কৰিবলৈ ওলাইছো । যিহেতু আমি এটা পৰ্যায়তে ৰৈ থাকিব নোৱাৰো সেয়ে লেভেল বঢ়াব লাগিব । একশ্যনৰ ওপৰত বহুত কষ্ট কৰা গৈছে । ইয়াৰে বহুখিনিয়ে সৰুৰে পৰা সমৰকলাৰ লগত জড়িত । লগতে এইবাৰ মৰিগাঁও আৰু কোকৰাঝাৰৰ পৰাও একশ্যনৰ বাবে ল’ৰা অনা হৈছে ।”
এই বিশেষ সাক্ষাৎকাৰটোত ছবিখনৰ আন দুগৰাকী শিল্পী জাভেদ আখটাৰ আৰু মণ্টু দেউৰীয়েও নিজৰ মনৰ কথা মুকলিকৈ প্ৰকাশ কৰে ৷ উল্লেখ্য যে, ছবিখনৰ চাৰিদিনত মুঠ উপাৰ্জন ৬০.৮৬ লাখ টকা ।
লগতে পঢ়ক : লোকেল কুংফুৰ সংলাপ লিখা চি-চাৰ্ট পিন্ধি চাবলৈ যাব পাৰিব লোকেল কুংফু 3 - Local Kung Fu merchandise
শিক্ষক দিৱসৰ দিনাই কিয় মুক্তি দিবলৈ লোৱা হৈছে লোকেল কুংফু 3 ? - LOCAL KUNG FU 3
