গুৱাহাটী, 8 জুলাই : কিছুদিন পূৰ্বে মুক্তি লাভ কৰা এখন নতুন অসমীয়া ৱেব চিৰিজ 'চুপা-চুপি'। নৱ-প্ৰজন্মৰ পৰিচালক প্ৰণৱ ভৰালীৰ পৰিচালনাৰে নিৰ্মাণ কৰা এই ৱেব চিৰিজখনে মুক্তিৰ পূৰ্বৰে পৰা সামাজিক মাধ্যমত চর্চা লাভ কৰা পৰিলক্ষিত হৈছিল । অৱশ্যে সেই চর্চাৰ এতিয়াও অন্ত পৰা নাই । দৰাচলতে ৱেব চিৰিজখনৰ ট্ৰেইলাৰ মুক্তিৰ পাচতেই একাংশই ৱেব চিৰিজখনৰ কাহিনীভাগ যৌনগন্ধী বুলি ধাৰণা কৰি লৈছিল । লগতে ৱেব চিৰিজখনৰ নামটোক লৈয়ো সামাজিক মাধ্যমত নেটিজেনে সমালোচনা কৰা পৰিলক্ষিত হৈছিল । ইফালে ৱেব চিৰিজখনৰ মুক্তিৰ পাচতো চিৰিজখনৰ কিছু দৃশ্যাংক লৈ বহুতে প্ৰতিক্ৰিয়া প্ৰকাশ কৰিছে ।
অসমৰ গ্ৰাম্যজীৱনৰ পটভূমিত নিৰ্মাণ কৰা এই নতুন ৱেব চিৰিজখনৰ কাহিনীভাগত তিনিজন ল'ৰাই নিজৰ যৌৱনকাল প্ৰাপ্তিৰ সময়ছোৱাত কৰা আচৰণ, মোবাইল ফোন অহাৰ পিচত হোৱা নানানটা নেতিবাচক ঘটনাৰ বিষয়ে উপস্থাপন কৰা হৈছে । দশম শ্ৰেণীৰ সেই তিনি ছাত্ৰৰ চৰিত্ৰত অভিনয় কৰিছে কৌশিক ভৰদ্বাজ, সপ্তৰ্ষি গগৈ আৰু জিৎ কলিতাই । ই টিভি ভাৰতৰ সৈতে হোৱা এটা সাক্ষাৎকাৰত ৱেব চিৰিজখনৰ তিনি অভিনেতাই জনাই ৱেব চিৰিজখনৰ সন্দৰ্ভত বহু কথা ।
লগতে পঢ়ক : মোবাইলত নহয় এইবাৰ ৰূপালী পৰ্দাত "বিদুৰভাই" - Assamese film Bidurbhai
ৱেব চিৰিজখনৰ সন্দৰ্ভত মন্তব্য কৰি চিৰিজখনত দীপকৰ চৰিত্ৰত অভিনয় কৰা কৌশিক ভৰদ্বাজে কয়, ‘চিৰিজখনত ৯০ দশকৰ এটা কাহিনী দেখুৱা হৈছে । স্কুলীয়া প্ৰেম, চিঠি লিখাৰ পৰা মোবাইল অহালৈ এই সকলোখিনি ৱেব চিৰিজখনত দেখুওৱা হৈছে । মোৰ চৰিত্ৰটো অকল মোৰে চৰিত্ৰ নহয় আমাৰ তিনিটা চৰিত্ৰক কেন্দ্ৰ কৰি এটা চৰিত্ৰ ৰূপায়িত কৰা হৈছে । ইফালে চাণক্যৰ চৰিত্ৰত অভিনয় কৰা জিৎ কলিতাই এই সন্দৰ্ভত কয়, ‘ৱেব চিৰিজখনত চাণক্য নামৰ যিটো চৰিত্ৰ সেই চৰিত্ৰটোক কেন্দ্ৰ কৰিয়ে গোটেই ৱেব চিজিৰখন হৈছে । চিঠি লিখাৰ পৰা আৰম্ভ কৰি ফোনত কথা পতালৈকে, গছৰ তলত বহি প্ৰেম কৰালৈকে এই সকলোবোৰ চিৰিজখনত উপস্থাপন কৰা হৈছে ।’
আনহাতে ৰূপৰ চৰিত্ৰত অভিনয় কৰা সপ্তৰ্ষি গগৈয়ে কয়, ‘সহজ-সৰল সমাজ এখনৰ কিছুমান সহজ-সৰল মানুহকলৈ ৱেব চিৰিজখন নিৰ্মাণ কৰা হৈছে । আমি যিটো বয়সৰ চৰিত্ৰত অভিনয় কৰিছো, সেইটো এটা সকলো সময়তে ফূৰ্তিত থকা এটা বয়স । সেই সময়ৰ এটা কাহিনী চিৰিজখনত উপস্থাপন কৰা হৈছে ৷’
সমান্তৰালকৈ তিনিওগৰাকী অভিনেতাই ৱেব চিৰিজখনক লৈ হোৱা বিতৰ্কৰ সন্দৰ্ভত কাহিনীভাগ উপভোগ কৰাটো সম্পূৰ্ণৰূপে দৰ্শকৰ দৃষ্টিভংগী বুলি মন্তব্য প্ৰকাশ কৰে । উল্লেখ্য যে, এই নতুন ৱেব চিৰিজখনৰ প্ৰযোজনা কৰিছে হৃষীকেশ পাটগিৰিয়ে । কাহিনী আৰু চিত্ৰনাট্য প্ৰণৱ ভৰালীৰ । চিৰিজখনৰ মুখ্য সহকাৰী পৰিচালক হিচাপে আছে জ্যোতিষ্মান শৰ্মা ।
লগতে পঢ়ক : "বিদুৰভাই" শ্বুটিঙৰ সময়ত কি কি হৈছিল ? ছবিখনক লৈ কি ক’লে পৰিচালক সুব্ৰত কাকতিয়ে - Assamese Movie Bidurbhai
