চিটাৰা ডেস্ক, ১৬ মাৰ্চ: চলচ্চিত্ৰ জগতত ওখ, সুস্থ শৰীৰ আৰু ধুনীয়া চেহেৰা হোৱাটো খুবেই প্ৰয়োজনীয় বুলি গণ্য কৰা হয় ৷ অভিনেতা বা অভিনেত্ৰী হোৱাৰ পিচত যিকোনো শিল্পীয়ে নিজৰ ব্যক্তিত্বৰ বিশেষ যত্ন লয়, যাতে তেওঁৰ প্ৰতিটো দিশ পৰ্দাত ভালকৈ দেখা যায় । কিন্তু এইবোৰ গুণ নথকাৰ পিচতো এনে এজন শিল্পী আছে যিয়ে নিজৰ কমেডীৰে বলীউডত আধিপত্য বিস্তাৰ কৰিছে । হয়, আমি কৈছোঁ ৰাজপাল যাদৱৰ কথা ।
১৯৭১ চনৰ ১৬ মাৰ্চত উত্তৰ প্ৰদেশৰ শ্বাহজাহানপুৰৰ কুণ্ড্ৰা গাঁৱত জন্মগ্ৰহণ কৰা ৰাজপাল যাদৱৰ আজি কোনো পৰিচয়ৰ প্ৰয়োজন নাই । তেওঁৰ সফলতা সকলোৱে পৰ্দাত দেখিছে । কিন্তু সফলতাৰ এই সোৱাদ লোৱাৰ আগতে তেওঁ ব্যক্তিগত জীৱনত বহু উত্থান-পতন দেখিবলগীয়া হৈছিল ৷ আজি ৫৩ সংখ্যক জন্মদিন উদযাপন কৰা ৰাজপাল যাদৱৰ হাতত অপৰিসীম ধন-সম্পত্তি আৰু বিলাসী বস্তুৰ অভাৱ নাই । কিন্তু পৰ্দাত সকলোকে হাঁহিৰ খোৰাক দিয়া ৰাজপাল যাদৱে এসময়ত বহু অসুবিধাৰ সন্মুখীন হৈছিল ৷ গতিকে তেওঁৰ এই বিশেষ দিনটোত জানো আহক তেওঁ চিনেমালৈ অহাৰ আগতে কেনেকুৱা আছিল আৰু কি কৰিছিল ৷
টেইলাৰিঙৰ সৈতে কেৰিয়াৰ আৰম্ভ কৰিছিল
অভিনেতাগৰাকীৰ বয়স তেতিয়া ১৯ বা ২০ বছৰ আছিল যেতিয়া তেওঁৰ প্ৰথম পত্নী কৰুণাৰ মৃত্যু হৈছিল আৰু তেওঁ নৱজাত কন্যা জ্যোতিৰ সৈতে অকলশৰীয়া হৈ পৰিছিল । হঠাৎ হোৱা এই ঘটনাই ৰাজপালক মানসিকভাৱে ভাঙি পেলাইছিল ৷ ইয়াৰ পিচত তেওঁ এটা চাকৰিত যোগদান কৰে, কিন্তু সেই কামৰ প্ৰতি আগ্ৰহ নথকাৰ বাবে বেছি দিন চলাই নিব নোৱাৰিলে । অৱশ্যে পৰিয়ালটোৰ আৰ্থিক অৱস্থাও বৰ ভাল নাছিল, সেয়েহে অভিনয় জগতত খোজ দিয়াৰ পূৰ্বে ৰাজপালে দৰ্জী কাম আৰম্ভ কৰিছিল ।
দৰ্জী কাম আৰম্ভ কৰিছিল যদিও ৰাজপালৰ সপোন আছিল সেনাবাহিনীত যোগদান কৰাৰ । ইয়াৰ বাবে তেওঁ বহু চেষ্টা কৰিছিল যদিও যেতিয়া বিষয়াসকলে ৰেলীত তেওঁৰ চুটি চাপৰ উচ্চতা দেখিছিল, তেতিয়া তেওঁক নাকচ কৰা হৈছিল । যাৰ বাবে তেওঁ বুজি পাইছিল যে এই দিশত তেওঁৰ একো নহ’ব । গতিকে সকলো পাহৰি তেওঁ দৰ্জী কাম কৰিবলৈ ধৰিলে । কিন্তু ৰাজপালে এই কাম কৰি আছিল যদিও মন নাছিল কৰিবলৈ ৷ যাৰ বাবে তেওঁ এই কামটোও বেছি দিন নকৰিলে ।
থিয়েটাৰৰ সৈতে কেনেদৰে জড়িত হৈছিল ৰাজপাল যাদৱ ?
ৰাজপালৰ প্ৰথম পত্নীৰ মৃত্যুৰ সময়ত তেওঁৰ কন্যা জ্যোতিৰ বয়স আছিল মাত্ৰ এদিন । ৰাজপালৰ বয়সো তেতিয়া কম আছিল । সৰুতে তেওঁৰ জীৱন গঢ়াৰ এক বৃহৎ সুযোগ আছিল যদিও কম বয়সতে বৰ্ধিত দায়িত্বৰ বাবে তেওঁ কেনেকৈ কি কৰিব লাগে বুজিব পৰা নাছিল । তাৰ পিচত মাতৃ আৰু পৰিয়ালৰ সকলো মহিলাই তেওঁৰ কন্যাক চোৱা-চিতা কৰিছিল, যাৰ বাবে ৰাজপালে নাট্য শিক্ষণৰ আবেগ পূৰণ কৰিবলৈ সক্ষম হৈছিল ।
১৯৯২ চনত ভাৰতেন্দু নাট্য একাডেমীত নামভৰ্তি কৰিছিল ৰাজপালে ৷ ইয়াত দুবছৰ অভিনয়ৰ প্ৰশিক্ষণ লোৱাৰ পিচত তেওঁ নেশ্যনেল স্কুল অৱ ড্ৰামাত পঢ়িছিল ৷ ইয়াৰ পৰাই ৰাজপালৰ কেৰিয়াৰে গতি লাভ কৰে আৰু কেইবছৰমানৰ পাচত মুম্বাই ভ্ৰমণৰ সময়ত ৰাজপালে টিভি আৰু তাৰ পিচত ছবিত অভিনয় কৰিবলৈ আৰম্ভ কৰে ।
ৰাজপাল যাদৱে ১০০ খনতকৈও অধিক ছবিত কাম কৰিছে । যদিও তেওঁ কমেডিয়ানৰ চৰিত্ৰৰ বাবে অধিক জনপ্ৰিয়তা লাভ কৰে ৷ কিন্তু সৰু পৰ্দাত খলনায়ক হৈও সকলোৰে হৃদয় জয় কৰিছিল ৰাজপালে । ৰাজপালে তেওঁৰ প্ৰতিটো চৰিত্ৰক এক নতুন স্তৰলৈ লৈ গৈছিল ।
এই টিভি ধাৰাবাহিকখনৰ পৰাই আৰম্ভ হৈছিল যাত্ৰা
চলচ্চিত্ৰলৈ অহাৰ পূৰ্বে ৰাজপালে নব্বৈৰ দশকৰ শেষৰ ফালে প্ৰকাশ ঝাৰ দূৰদৰ্শন শ্ব’ ‘মুংগেৰী কে ভাই নৌৰাংগিলাল’ত কাম কৰিছিল । এই শ্ব’টোৱেই আছিল ‘মুংগেৰিলাল কে হাছিন সপ্নে’ৰ পৰৱৰ্তী অংশ, যিটো সমগ্ৰ দেশতে হিট হৈছিল ।
টিভিৰ জগতখনত ভৰি দিয়া ৰাজপালে নিজকে প্ৰতিষ্ঠা কৰিবলৈ প্ৰথমে সৰু সৰু চৰিত্ৰত অভিনয় কৰিছিল ৷ তাৰ পিচতে অতি কম সময়ৰ ভিতৰতে বহুকেইটা কাম পাবলৈ আৰম্ভ কৰিছিল । অৱশ্যে ডাঙৰ পৰ্দাত কামৰ হেঁপাহ আছিল অভিনেতাগৰাকীৰ । অৱশেষত ১৯৯৯ চনৰ ‘দিল ক্যা কৰে’ ছবিৰ পৰা অভিনেতাগৰাকীয়ে বলীউডত আত্মপ্ৰকাশৰ সুযোগ পায় । ছবিখনত সৰু চৰিত্ৰত অভিনয় কৰাৰ পিচত ৰাজপালক বহু ছবিত সৰু সৰু চৰিত্ৰত অভিনয় কৰা দেখা গৈছিল যদিও তথাপিও তেওঁৰ জীৱনত আছিল মাথোঁ ‘ভাগম ভাগ’।
অভিনেতাগৰাকীয়ে ‘জংগল’ ছবিখনত খলনায়ক হৈ বলীউডত ভৰি দিব বিচাৰিছিল যদিও সফলতা লাভ কৰিব নোৱাৰিলে । ৰাজপালৰ ভাগ্য সলনি হয় ‘মালামাল’ আৰু ‘পিয়াৰ টুনে কিয়া কিয়া’ ছবিৰ পৰা । ইয়াৰ পিচত অভিনেতাজনে বহুকেইখন ছবিত কাম কৰিছিল । ‘হাংগামা’, ‘অপনা সপনা মানি মানি’, ‘ভূল ভুলাইয়া’, ‘চুপ চুপ কে’, ‘ফিৰ হেৰা ফেৰী’, ‘ঢোল’, ‘মে,মেৰী পত্নী আৰু ৱ’, ‘মুঝছে শ্বাদি কৰোগি’, 'গৰম মছলা', 'ভূতনাথ'ৰ দৰে বহু ছবিত নিজৰ অভিনয়ৰে দৰ্শকৰ হৃদয়ত এক সুকীয়া স্থান বনাবলৈ কৰিবলৈ সক্ষম হয় ৷
