নিউজ ডেস্ক, ৩১ মে': বৰাকৰ সাম্প্ৰতিক বান পৰিস্থিতিৰ প্ৰতি লক্ষ্য ৰাখি বন্ধ কৰি দিয়া হৈছে ৰে'লৰ চলাচল ৷ যাৰ ফলত চুবুৰীয়া ৰাজ্য ত্ৰিপুৰাত খাদ্য় শস্যৰ লগতে ইন্ধনৰ অভাৱে দেখা দিয়াৰ আশংকা দেখা গৈছে ৷ যাৰ বাবে কম-বেছি পৰিমাণে চিন্তিত হৈ পৰিছে ৰাজ্যখনৰ জনসাধাৰণ ৷
এনে পৰিস্থিতিত জনসাধাৰণৰ এই চিন্তাৰ প্ৰতি সঁহাৰি জনাই ত্ৰিপুৰাৰ খাদ্য় আৰু অসামৰিক মন্ত্ৰালয়ৰ মন্ত্ৰী সুশান্ত চৌধুৰীয়ে আশ্বাস প্ৰদান কৰিছে যে ৰাজ্যখনত পৰ্যাপ্ত পৰিমাণে খাদ্য সামগ্ৰী মজুত আছে ৷ যাৰ বাবে ৰাজ্যবাসী আতংকিত হোৱাৰ কোনো প্ৰয়োজন নাই ৷
মন্ত্ৰী সুশান্ত চৌধুৰীয়ে সংবাদ মাধ্যমৰ আগত প্ৰকাশ কৰা অনুসৰি, ৰে'ল সেৱা ব্যাহত হ'লেও খাদ্য সামগ্ৰী বা ইন্ধনৰ বাবে ৰাইজে হাহাকাৰ কৰিব নালাগে । ৰাজ্যত যথেষ্ট পৰিমাণৰ খাদ্য শস্য, পেট্ৰ'ল আৰু পেট্ৰ'লিয়াম সামগ্ৰী মজুত আছে । তেওঁ ৰাইজক আতংকিত নহ'বলৈ আহ্বান জনায় । ত্ৰিপুৰা চৰকাৰে উত্তৰ-সীমান্ত ৰে'লৱেৰ সৈতে যোগাযোগ কৰি আছে আৰু তেওঁলোকে ৰে'ল সেৱা পুনৰুদ্ধাৰৰ বাবে নিৰন্তৰ কাম কৰি আছে ।
