শ্ৰীনগৰ: জম্মু-কাশ্মীৰৰ শ্ৰীনগৰত শনিবাৰে পুৱা নিৰাপত্তা বাহিনী আৰু সন্ত্ৰাসবাদীৰ মাজত সংঘৰ্ষ হয় । নিৰাপত্তা বাহিনীয়ে সন্ত্ৰাসবাদীৰ উপস্থিতিৰ তথ্য লাভ কৰাৰ পিছতে শ্ৰীনগৰৰ খানিয়াৰত তালাচী অভিযান আৰম্ভ কৰে ৷ নিৰাপত্তাৰক্ষীৰ অভিযানৰ সময়ত অঞ্চলটোত এটা আৱাসগৃহত আত্মগোপন কৰি থকা সন্ত্ৰাসবাদীটোৱে গুলীচালনা আৰম্ভ কৰে ৷ প্ৰত্য়ুত্তৰত নিৰাপত্তাৰক্ষীয়ে গুলীচালনা কৰে ৷
জম্মু-কাশ্মীৰ আৰক্ষীৰ এগৰাকী বিষয়াই বিয়লি জনোৱা মতে, শ্ৰীনগৰত দিনজোৰা এনকাউণ্টাৰৰ অন্ত পৰে আৰু এটা সন্ত্ৰাসবাদী নিহত হোৱাৰ লগতে চাৰিজন নিৰাপত্তা বাহিনীৰ জোৱান আহত হয় ।
কাশ্মীৰৰ আৰক্ষী মহাপৰিদৰ্শকে নিশ্চিত কৰিছে যে এটা সন্ত্ৰাসবাদী নিহত হোৱাৰ লগতে দুজন আৰক্ষী আৰু দুজন কেন্দ্ৰীয় সংৰক্ষিত আৰক্ষী বাহিনীৰ জোৱান আহত হৈছে । তেওঁ নিহত সন্ত্ৰাসবাদীটোক মষ্ট ৱাণ্টেড পাকিস্তানী সন্ত্ৰাসবাদী অধিনায়ক ওছমান ওৰফে ছোটা ৱালিদ বুলি চিনাক্ত কৰি লগতে কয় যে, “নৱেম্বৰ মাহত তেওঁ পৰিদৰ্শক মাছৰুৰ আহমেদ ৱানীক হত্যাৰ সৈতে জড়িত আছিল ।”
বিষয়াজনে জনোৱা মতে, "সন্ত্ৰাসবাদী কাৰ্যকলাপত তেওঁৰ জড়িততাৰ বিশদ তথ্য তদন্ত সম্পূৰ্ণ হোৱাৰ পিছতহে পোহৰলৈ আহিব । অভিযানৰ সময়ত চি আৰ পি এফৰ দুজন জোৱান আৰু জম্মু-কাশ্মীৰ আৰক্ষীৰ দুজন লোকো সামান্য আঘাতপ্ৰাপ্ত হয় । আত্মগোপন কৰি থকা এটা সন্ত্ৰাসবাদীয়ে আৱাসিক ঘৰৰ পৰা নিৰাপত্তাৰক্ষীৰ ফালে গ্ৰেনেড নিক্ষেপ কৰাৰ ফলত সেনা জোৱানকেইজন আহত হয় ।"
বিষয়াগৰাকীয়ে লগতে কয়, "মৃতদেহটো উদ্ধাৰ কৰি আইনী আনুষ্ঠানিকতাৰ বাবে শ্ৰীনগৰৰ আৰক্ষী নিয়ন্ত্ৰণ কক্ষলৈ প্ৰেৰণ কৰা হৈছে । ওছমান লস্কৰ-ই-তৈবাৰ সৈতে জড়িত আছিল । উপত্যকাৰ অস্থানীয় প্ৰব্ৰজিত শ্ৰমিকক লক্ষ্য কৰি লোৱাৰ বাবে এই সংগঠনটোক দোষাৰোপ কৰা হৈছে ।
এনকাউণ্টাৰটো শেষৰ পৰ্যায়ত থকাৰ সময়তে আৱাসিক ঘৰটোত জুই লগাত ব্যাপক ক্ষতিসাধন হয় । অভিযানৰ সময়ত যিকোনো ধৰণৰ বিস্ফোৰণৰ ফলত যাতে যিকোনো ধৰণৰ দুৰ্ঘটনাৰ পৰা হাত সাৰিব পাৰি, তাৰ বাবে এই স্থানত জনতাৰ প্ৰৱেশ নিষিদ্ধ কৰা হৈছে । দিনটো বন্দুকৰ গুলী আৰু বিস্ফোৰণৰ শব্দ শুনা যায়, যাৰ ফলত অঞ্চলটোত দোকান-পোহাৰ বন্ধ হৈ পৰে আৰু বিকল্প পথেৰে যাতায়তৰ ব্যৱস্থা কৰা হয় ।
চৰকাৰী সূত্ৰ অনুসৰি সন্ত্ৰাসবাদীটো আত্মগোপন কৰা আৱাসগৃহটো নিহত জৈছ-ই-মহম্মদ (জেম) আত্মঘাতী বোমাৰুৰ ভাতৃৰ । খানিয়াৰৰ দ্বাদশ শ্ৰেণীৰ ছাত্ৰ আফক শ্বাহে ২০০০ চনত শ্ৰীনগৰৰ বদামি বাগ চাউনত এখন মাৰুতি ৮০০ গাড়ী উৰুৱাইছিল আৰু কাশ্মীৰৰ তিনি দশকজোৰা বিদ্ৰোহৰ প্ৰথমটো স্থানীয় আত্মঘাতী বোমাৰু হিচাপে পৰিগণিত হৈছিল ।
জম্মু-কাশ্মীৰ বিধানসভাৰ প্ৰথমখন অধিৱেশনৰ দুদিন পূৰ্বে আৰু বুডগামত দুজন অস্থানীয় শ্ৰমিকক সন্ত্ৰাসবাদীয়ে আক্ৰমণ কৰাৰ কেইঘণ্টামানৰ পিছত শ্ৰীনগৰৰ মাজমজিয়াত হোৱা এই আক্ৰমণে বিশেষ তাৎপৰ্য লাভ কৰিছে ।
লগতে পঢ়ক: শ্ৰীনগৰৰ খানিয়াৰত নিৰাপত্তা বাহিনী আৰু সন্ত্ৰাসবাদীৰ সংঘৰ্ষ
