তেজপুৰ, ২৮ আগষ্ট : পূব অৰুণাচল প্ৰদেশৰ উজনি সোৱণশিৰি জিলাত সেনাৰ বাহন দুর্ঘটনাগ্ৰস্ত । মুঠ ৮ গৰাকী লোকক সীমান্তৰ পৰা কঢ়িয়াই লৈ অহা বাহনখন বৰাৰুপাক নামৰ ঠাইত নিশা কটোৱাৰ পিচত পুৱতি নিশা এই দুৰ্ঘটনাটো সংঘটিত হয় । দুৰ্ঘটনাটোত তিনিজন সেনা জোৱানৰ মৃত্যু হয় ।
সেনাৰ গাড়ী দুর্ঘটনাগ্ৰস্ত
অৰুণাচল প্ৰদেশৰ ট্ৰেন্স অৰুণাচল ঘাইপথৰ সীমান্তত টাপি অঞ্চলৰ সমীপত সেনাবাহিনীৰ এখন ট্ৰাক দুর্ঘটনাগ্ৰস্ত হৈ পাহাৰৰ এটা গভীৰ খাদত পৰি ডুব যোৱাৰ ফলত তিনিজন সেনা জোৱান নিহত হয় । উজনি সোৱণশিৰি জিলাৰ পাহাৰীয়া পথত বাহনখন আহি থকা অৱস্থাত সংঘটিত হয় এই শোকাৱহ দুৰ্ঘটনাটো । অৱশ্যে সেনাৰ তৰফৰ পৰা এই বিষয়ে কোনো তথ্য সদৰী কৰা নাই ।
জানিব পৰা মতে, দুৰ্ঘটনাটোত নিহত সেনা জোৱান তিনিজনক হাবিলদাৰ নাখাত সিং, নায়ক মুকেশ কুমাৰ আৰু গ্ৰেনেডিয়াৰ আশিস কুমাৰ বুলি চিনাক্তকৰণ কৰা হৈছে ।
অৰুণাচলৰ মুখ্যমন্ত্ৰীৰ শোক প্ৰকাশ
অৰুণাচল প্ৰদেশৰ মুখ্যমন্ত্ৰী পেমা খাণ্ডুৱে তেওঁৰ সামাজিক মাধ্যম এক্সত জোৱানকেইজনৰ নাম উল্লেখ কৰিছে । পোষ্টটোত তেওঁ লিখিছে, "এই খবৰে তেওঁক মৰ্মাহত কৰিছে । সেনাবাহিনীৰ বীৰ জোৱানকেইজনৰ আত্মাৰ শান্তিৰ বাবে ভগৱানৰ ওচৰত প্ৰাৰ্থনা জনাইছোঁ ।"
I am deeply pained by loss of lives of three @adgpi personnel - Havildar Nakhat Singh, Naik Mukesh Kumar and Grenadier Ashish Kumar - in a tragic accident near Tapi in Upper Subansiri district.
— Pema Khandu པདྨ་མཁའ་འགྲོ་། (@PemaKhanduBJP) August 28, 2024
Their service to the nation and supreme sacrifice will be remembered with highest…
গাড়ীখনত মুঠ ৮ জন জোৱান আছিল
জানিব পৰা মতে, সেনাৰ 8 জন জোৱানক কঢ়িয়াই অনা বাহনখন প্ৰশিক্ষণৰ পিছত ফৰৱাৰ্ড এলেকাৰ পৰা আহি টাপিৰ ওচৰত (বৰাৰুপাকৰ পৰা ১৫ কিলোমিটাৰ) দুৰ্ঘটনাৰ কবলত পৰে । মঙলবাৰে বৰাৰুপাকত নিশাটো কটাইছিল সেনাৰ জোৱানকেইজনে ।
আনহাতে, দুৰ্ঘটনাটোত বাকী জোৱানকেইজনো আঘাতপ্ৰাপ্ত হয় যদিও তেওঁলোকৰ প্ৰাণ কথমপি ৰক্ষা পৰে । সেনাৰ সূত্ৰত জানিব পৰা মতে, তেওঁলোক বৰ্তমান চিকিৎসাধীন । ইফালে ভাৰতীয় সেনাৰ ইষ্টাৰ্ণ কামাণ্ডৰ তৰফৰ পৰা এক্সত এই বিষয়ে উল্লেখ কৰি নিহতসকললৈ শ্ৰদ্ধাঞ্জলি জ্ঞাপন কৰে ।
#IndianArmy #EasternCommand #InTheLineofDuty#LestWeForget
— EasternCommand_IA (@easterncomd) August 27, 2024
Lt Gen RC Tiwari, #ArmyCdrEC & All Ranks express deepest condolences on the sad demise of Bravehearts Hav Nakhat Singh, Nk Mukesh Kumar and Gdr Ashish who made the supreme sacrifice in the line of duty in… pic.twitter.com/LcRAdHKK5h
উল্লেখ্য যে নিহত জোৱানকেইজন ডুমডুমাৰ ৰূপাইস্থিত ১৯ নং গ্ৰেনেডিয়াৰৰ । সীমান্তত প্রশিক্ষণ সামৰি তিনিচুকীয়ালৈ উভতি আহিছিল সেনাৰ দলটো ৷ নিহত জোৱানকেইজনক অৰুণাচল প্ৰদেশৰ হাইলং সেনা ছাউনিত শেষ শ্ৰদ্ধাঞ্জলি জ্ঞাপন কৰি সেনাৰ বিমানেৰে ডিব্ৰুগড় বিমানবন্দৰলৈ প্ৰেৰণ কৰা হৈছে । ডিব্ৰুগড় বিমানবন্দৰৰ পৰা বিশেষ বিমানেৰে মৃতদেহকেইটা নিজ নিজ গৃহলৈ প্ৰেৰণ কৰিব ৷
