বিশেষ প্ৰতিবেদন, ৯ অক্টোবৰ : ৯ অক্টোবৰত ভাৰতীয় টেৰিটৰিয়েল আৰ্মীৰ গঠন হৈছিল । সেয়ে এই দিনটোক টেৰিটৰিয়েল আৰ্মীৰ গঠন দিৱস হিচাপে উদযাপন কৰা হয় । এইবাৰ টেৰিটৰিলে আৰ্মীয়ে ৭৬ সংখ্যক প্ৰতিষ্ঠা দিৱস উদযাপন কৰিছে । ভাৰতৰ টেৰিটৰিয়েল আৰ্মী বা টি এ হৈছে অংশকালীন সময়ৰ স্বেচ্ছাসেৱকসকলৰ দ্বাৰা গঠিত এক সহায়ক সামৰিক সংগঠন । এই সংগঠনটোৱে ভাৰতীয় সেনাক সমৰ্থন সেৱা প্ৰদান কৰে । এই বিভাগটোত বিভিন্ন বিষয়া, জুনিয়ৰ কমিছনড অফিচাৰ, নন-কমিছনড অফিচাৰ আৰু ভাৰতীয় সেনাৰ দৰে একে পদবীৰ অন্যান্য কৰ্মচাৰী আছে ।
টি এৰ ভূমিকা হৈছে "নিয়মীয়া সেনাক নিৰ্দিষ্ট কৰ্তব্যৰ পৰা সকাহ দিয়া আৰু প্ৰাকৃতিক দুৰ্যোগৰ মোকাবিলা কৰাৰ লগতে অত্যাৱশ্যকীয় সেৱা বৰ্তাই ৰখাত অসামৰিক প্ৰশাসনক সহায় কৰা" আৰু "প্ৰয়োজন অনুসৰি নিয়মীয়া সেনাৰ বাবে ইউনিট প্ৰদান কৰা"।
টেৰিটৰিয়েল আৰ্মীৰ ইতিহাস
১৯২০ চনত ব্ৰিটিছসকলে ১৯২০ চনৰ ইণ্ডিয়ান টেৰিটৰিয়েল আইনৰ জৰিয়তে টি এ গঠন কৰিছিল আৰু ইয়াক দুটা শাখাত সংগঠিত কৰা হৈছিল । সেই দুটা হৈছে ইউৰোপীয় আৰু এংলো-ইণ্ডিয়ানসকলৰ বাবে 'অক্সিলিয়াৰী ফ'ৰ্চ' আৰু ভাৰতীয় স্বেচ্ছাসেৱকসকলৰ বাবে 'ইণ্ডিয়ান টেৰিটৰিয়েল ফ'ৰ্চ' ।
স্বাধীনতাৰ পিচত টেৰিটৰিয়েল আৰ্মী আইন 1948 চনত গৃহীত হয় আৰু প্ৰথম ভাৰতীয় গভৰ্ণৰ জেনেৰেল চি ৰাজাগোপালাচাৰীয়ে 1949 চনৰ 9 অক্টোবৰত আনুষ্ঠানিকভাৱে টেৰিটৰিয়েল আৰ্মী উদ্বোধন কৰে ।
টেৰিটৰিয়েল আৰ্মীৰ শক্তি : টি এৰ প্ৰায় 40,000 সেনা আছে । তেওঁলোকে 'বিভাগীয় ইউনিট' যেনে ৰে'লৱে, ভাৰতীয় তেল নিগম, তেল আৰু প্ৰাকৃতিক গেছ নিগম আৰু জেনেৰেল হস্পিটেলত সেৱা আগবঢ়ায়; আৰু 'অনা-বিভাগীয় ইউনিট', যেনে পদাতিক বেটেলিয়ন আৰু ইক'লজিকেল বেটেলিয়ন হিচাপেও সেৱা আগবঢ়ায় ।
টেৰিটৰিয়েল আৰ্মীৰ ভূমিকা
- নিয়মীয়া সেনাক নিৰ্ধাৰিত কৰ্তব্যৰ পৰা সকাহ দিয়া আৰু প্ৰয়োজন হ'লে অসামৰিক শক্তিক সমৰ্থন কৰা
- দেশৰ উপকূলীয় প্ৰতিৰক্ষা আৰু বিমানবিৰোধী প্ৰতিৰক্ষাৰ বাবে ইউনিট প্ৰদান কৰা
- প্ৰয়োজন হ'লে নিয়মীয়া সেনাক ইউনিট প্ৰদান কৰা।
টি এ সকলো অস্ত্ৰ আৰু সেৱাৰে গঠিত– পদাতিক, সশস্ত্ৰ, অভিযন্তা, ছিগনেল, সেৱা বাহিনী আৰু চিকিৎসা । ইয়াক দুটা পৃথক ইউনিটত সংগঠিত কৰা হয়– প্ৰাদেশিক আৰু নগৰীয়া । ডাঙৰ চহৰবোৰত নগৰীয়া গোটবোৰ গঠন কৰা কৰা হয় আৰু জোৱানসকলে সাপ্তাহিক প্ৰশিক্ষণ লয় । গাঁওবাসীৰ অংশগ্ৰহণক উৎসাহিত কৰিবলৈ আনটো ইউনিটে গ্ৰামাঞ্চলৰ পৰা জোৱানসকলক ভৰ্তি কৰে । এনে লোকসকলৰ বাবে দুমাহৰ বাৰ্ষিক প্ৰশিক্ষণ শিবিৰ অনুষ্ঠিত কৰা হয়, যাতে তেওঁলোকে বছৰটোৰ বাকী সময়ত তেওঁলোকৰ নিজ নিজ বৃত্তিত নিয়োজিত থাকিব পাৰে ।
যুদ্ধ আৰু জৰুৰীকালীন অৱস্থা দুয়োটা ক্ষেত্ৰতে টি এক প্ৰয়োজনীয়তা অনুসৰি নিয়োগ কৰা হয় । এনে সময়ত ইউনিটৰ কৰ্মচাৰীসকলক নিয়মীয়া সেনাৰ দৰে দৰমহা আৰু ভাট্টাকে ধৰি সকলো একেটা পৰ্যায়ত দিয়া হয় । টি এ কৰ্মীসকলক নিয়মীয়া সেনা আয়োগত যোগদান কৰাৰ বাবে অতিৰিক্ত সুবিধা দিয়া হয় আৰু ইয়াৰ বাবে খালী পদৰ এক নিৰ্দিষ্ট শতাংশ সামৰিক একাডেমীত সংৰক্ষিত কৰা হয় ।
অভিযান : ১৯৬২, ১৯৬৫ আৰু ১৯৭১ চনৰ যুদ্ধৰ সময়ত টি এ ইউনিটবোৰো সক্ৰিয়ভাৱে অভিযানত জড়িত আছিল । 2020 চনৰ পৰা ভাৰতীয় সামৰিক বাহিনীয়ে উন্নত কাৰ্যকৰী আৰু চোৰাংচোৱা ভূমিকাৰ বাবে টি এক পুনৰ সংগঠিত কৰি আহিছে, বিশেষকৈ সম্ভাৱ্য চীনা অনুপ্ৰৱেশৰ ওপৰত নজৰ ৰাখিবলৈ আন্দামান দ্বীপপুঞ্জত দায়িত্ব প্ৰদান কৰা হৈছে ।
এল অ' চিত মহিলা বিষয়াক নিযুক্তিত অনুমোদন : টেৰিটৰিয়েল আৰ্মীয়ে ২০১৯ চনত মহিলা বিষয়াক নিযুক্তি দিয়া প্ৰক্ৰিয়া আৰম্ভ কৰে । ২০২৩ চনৰ এপ্ৰিললৈকে এই মহিলা বিষয়াসকলে ইক'লজিকেল টাস্ক ফ'ৰ্চ ইউনিট, টি এ তৈল খণ্ডৰ ইউনিট আৰু টি এ ৰে'ল অভিযন্তা ৰেজিমেণ্টক সেৱা আগবঢ়াব পাৰিছিল । এই সময়ছোৱাত লাভ কৰা অভিজ্ঞতাৰ ওপৰত ভিত্তি কৰি টি এত মহিলা বিষয়াসকলৰ বাবে নিযুক্তিৰ সুযোগ আৰু বৃদ্ধি কৰাৰ বাবে এক বিবেচিত প্ৰস্তাৱ প্ৰস্তুত কৰা হৈছিল, যাক 2023 চনৰ এপ্ৰিল মাহত প্ৰতিৰক্ষা মন্ত্ৰীয়ে অনুমোদন জনাইছিল ।
টেৰিটৰিয়েল আৰ্মীৰ মহিলা বিষয়াসকলক বৰ্তমান নিয়ন্ত্ৰণ ৰেখাত সেৱা আগবঢ়োৱা টেৰিটৰিয়েল আৰ্মীৰ অভিযন্তা ৰেজিমেণ্ট আৰু সাংগঠনিক প্ৰয়োজনীয়তা অনুসৰি নতুন দিল্লীৰ টি এ গ্ৰুপৰ মুখ্য কাৰ্যালয়/টেৰিটৰিয়েল আৰ্মী সঞ্চালকালয়ত ষ্টাফ অফিচাৰ হিচাপে নিযুক্তি দিয়া হৈছে । এই প্ৰগতিশীল নীতিগত পদক্ষেপৰ উদ্দেশ্য হৈছে মহিলা বিষয়াসকলৰ নিযুক্তিৰ পৰিসৰ বৃদ্ধি কৰা আৰু লগতে তেওঁলোকৰ পেছাদাৰী আকাংক্ষা পূৰণ কৰা ।
75 সংখ্যক প্ৰতিষ্ঠা দিৱসত মাণ্ডাৰিন ভাষা বিশেষজ্ঞৰ নিযুক্তি :
টেৰিটৰিয়েল আৰ্মীয়ে মাণ্ডাৰিন ভাষা বিশেষজ্ঞৰ এটা ইউনিট অন্তৰ্ভুক্ত কৰিছে আৰু তেওঁলোকক সন্মুখৰ অঞ্চলবোৰত নিযুক্তি দিছে । ই হৈছে চীনা সেনাৰ সৈতে সীমান্ত আলোচনাৰ সময়ত ভাৰতীয় পক্ষৰ ভাষিক ক্ষমতা বৃদ্ধি কৰাৰ এক পদক্ষেপ ।
ইয়াৰ উপৰি টেৰিটৰিয়েল আৰ্মী আলোচনাৰ 'উন্নত পৰ্যায়ত' জড়িত হৈ আছে আৰু কিছুমান চাইবাৰ নিৰাপত্তা বিশেষজ্ঞ নিয়োগ কৰাৰ বাবে 'চৰ্ত চিনাক্ত' কৰিছে ।
টেৰিটৰিয়েল আৰ্মীৰ সেনা হোৱাৰ প্ৰক্ৰিয়া : টেৰিটৰিয়েল আৰ্মী ১৯৪৮ চনত গঠন হৈছিল । ইয়াত অসামৰিক লোক আৰু প্ৰাক্তন সেনা উভয়েই অন্তৰ্ভুক্ত থাকিব পাৰে । টেৰিটৰিয়েল আৰ্মীত দৰমহা বহুতো ভাট্টা আৰু লাভালাভৰ সৈতে দিয়া হয় ।
টেৰিটৰিয়েল আৰ্মীত নিযুক্তি পাবলৈ প্ৰাৰ্থীসকলে এক লিখিত পৰীক্ষা আৰু সাক্ষাৎকাৰত উত্তীৰ্ণ হ'ব লাগিব । ইয়াৰ পিচত তেওঁলোকক সামৰিক প্ৰশিক্ষণ দিয়া হয় ।
