নেশ্যনেল ডেস্ক, ১৬ এপ্ৰিল : সোমবাৰে নিশা ওড়িশাত শোকাৱহ পথ দুৰ্ঘটনা । উৰণ সেতুৰ পৰা তলত বাগৰি পৰিল যাত্ৰীবাহী বাছ । দুৰ্ঘটনাটোত ৫ গৰাকী লোক নিহত হোৱাৰ খবৰ পোৱা গৈছে । সমান্তৰালকৈ বহু লোক আহত হৈছে । আৰক্ষী সূত্ৰৰ পৰা জানিব পৰা মতে ওড়িশাৰ জাজপুৰৰ এখন উৰণ সেতুত সংঘটিত হৈছে এই দুৰ্ঘটনাটো । আৰক্ষীয়ে জনোৱা মতে দুৰ্ঘটনাত পতিত বাছখন পুৰীৰ পৰা পশ্চিমবংগ অভিমুখে যাত্ৰা কৰি আছিল ।
বাছখনত প্ৰায় ৪২ গৰাকী যাত্ৰী আছিল । জাজপুৰৰ আৰক্ষী অধীক্ষক বিনীত আগৰৱালে কয় যে আঘাতপ্ৰাপ্ত লোকসকলক কটকৰ এছচিবি চিকিৎসা মহাবিদ্যালয়লৈ প্ৰেৰণ কৰা হৈছে । তেওঁ উল্লেখ কৰা মতে দুৰ্ঘটনাটোত ৫ জন লোকৰ মৃত্যু হৈছে । মুখ্য জিলা চিকিৎসা বিষয়া (চিডিএমঅ') শিবাশীষ মোহৰানাই কোৱা মতে আহত ৩৮ জনৰ ভিতৰত এজনৰ অৱস্থা সংকটজনক ।
অৱশ্যে দুৰ্ঘটনাটো কেনেকৈ সংঘটিত হ'ল সেয়া এতিয়াও জানিব পৰা হোৱা নাই । দুৰ্ঘটনাৰ খবৰ পোৱাৰ লগে লগে আৰক্ষী উপস্থিত হৈ উদ্ধাৰ অভিযান আৰম্ভ কৰে । অগ্নি নিৰ্বাপক বাহিনীৰ লোকসকলেও ঘটনাস্থলীত উপস্থিত হৈ উদ্ধাৰ অভিযানত সহযোগিতা কৰে । আৰক্ষীয়ে এই সন্দৰ্ভত এটা গোচৰ ৰুজু কৰি তদন্ত আৰম্ভ কৰিছে । একাংশ প্ৰত্যক্ষদৰ্শীয়ে জনোৱা মতে বাছখনৰ চালকজনে নিয়ন্ত্ৰণহীনভাৱে বাছখন চলাই আছিল । তেওঁলোকে সন্দেহ কৰা মতে চালকজনে মদ্যপান কৰি আছিল ।
ইফালে মুখ্যমন্ত্ৰী নবীন পাটনায়কে এই দুৰ্ঘটনাক লৈ শোক প্ৰকাশ কৰিছে । নিহত লোকসকলৰ আত্মাৰ সদগতিৰ বাবে তেওঁ প্ৰাৰ্থনাও কৰিছে । লগতে দুৰ্ঘটনাটোত মৃত্যু হোৱা লোকসকলৰ পৰিয়াললৈ ৩ লাখ টকাৰ ক্ষতিপূৰণ আগবঢ়োৱাৰ কথাও ঘোষণা কৰিছে ।
লগতে পঢ়ক :শোকাৱহ : গাড়ীৰ ভিতৰতে জীৱন্তে জ্বলি মৃত্যু হ’ল 7 গৰাকী যাত্ৰীৰ - Tragic Incident In Sikar Rajasthan
