নিউজ ডেস্ক, 13 অক্টোবৰ: এন চি পিৰ নেতা বাবা ছিদ্দিকীৰ হত্যাকাণ্ডৰ তদন্ত কৰা আৰক্ষীৰ দলটোৱে জনোৱা মতে, তেওঁলোকে সংগ্ৰহ কৰা প্ৰাৰম্ভিক তথ্য অনুসৰি দুটা পিষ্টলৰ পৰা ছিদ্দিকীৰ ওপৰত মুঠ ছটা গুলী নিক্ষেপ কৰা হৈছিল । ইয়াৰে তিনিটা গুলীয়ে বাবা ছিদ্দিকীৰ বুকুত আঘাত কৰাৰ বিপৰীতে এটা গুলীয়ে গাড়ীত তেওঁৰ লগত থকা ব্যক্তিজনৰ ভৰিত আঘাত কৰে ।
বাবা ছিদ্দিকীৰ বাহনখন বুলেট প্ৰুফ হ’লেও গুলী গ্লাছ ভেদি সোমাই যায় । আৰক্ষীৰ সূত্ৰই জনোৱা মতে, আক্ৰমণকাৰীৰ হাতত নিশ্চয় অত্যাধুনিক পিষ্টল আছিল । বাবা ছিদ্দিকীক ওচৰৰ পৰা গুলীয়াই হত্যা কৰা হয় । পাচত কাপোৰেৰে মুখ ঢাকি ৰখা আক্রমণকাৰী তিনিজন পলাই গৈ থকা অৱস্থাত একাংশ লোকে দুজনক কৰায়ত্ত কৰি আৰক্ষীৰ হাতত গতাই দিয়ে ৷
সম্প্ৰতি সেই স্থানত উপস্থিত হৈছে আৰক্ষীৰ ফৰেনছিক দল । ঘটনাস্থলীৰ পৰা আৰক্ষীয়ে এটা পিষ্টল আৰু গুলীৰ খালী কাৰ্টিজ উদ্ধাৰ কৰে । ঘটনাস্থলীত উদ্ধাৰ হোৱা পিষ্টলটো ১৩ টা গুলীৰ মেগজিন থকা ৯.৯ এম এম পিষ্টল বুলি জনাইছে আৰক্ষীয়ে । এই পিষ্টলটো অত্যাধুনিক বুলি আৰক্ষীৰ সূত্ৰই লগতে কয় । আৰক্ষীৰ সূত্ৰৰ পৰা জানিব পৰা মতে, বাবা ছিদ্দিকীৰ পুত্ৰ জীশানৰ কাৰ্যালয়ৰ পৰা ওলাই অহাৰ সময়তে এই আক্ৰমণ সংঘটিত হয় ।
বিজয় দশমী উপলক্ষে বান্দ্ৰাৰ খেটৱাড়ী অঞ্চলৰ মাজেৰে শোভাযাত্ৰা পাৰ হৈ গৈছিল । গতিকে অঞ্চলটো বাদ্যযন্ত্ৰ আৰু ক্ৰেকাৰৰ শব্দৰে কোলাহলপূৰ্ণ হৈ আছিল । পোহৰলৈ আহিছে যে আক্রমণকাৰীয়ে ইয়াৰ সুযোগ লৈ বাবা ছিদ্দিকীক গুলীচালনা কৰে ৷ এই ঘটনাৰ পাচতে বাবা ছিদ্দিকীক লীলাৱতী হাস্পতাললৈ লৈ যোৱা হয় ৷ ইফালে তেওঁৰ সমৰ্থকসকলো লীলাৱতী চিকিৎসালয়ৰ বাহিৰত সমবেত হয় বুলি সূত্ৰই জানিবলৈ দিয়ে ।
সম্প্ৰতি মুম্বাই আৰক্ষীৰ জ্যেষ্ঠ বিষয়াসকল সেই স্থানত উপস্থিত হৈ তদন্ত আৰম্ভ কৰিছে । একাংশ আৰক্ষীৰ দলে এই ঘটনাৰ তদন্ত অব্যাহত ৰাখিছে । সূত্ৰসমূহে আৰু জনোৱা মতে, পষেক পূৰ্বে বাবা ছিদ্দিকীে মৃত্যুৰ ভাবুকি লাভ কৰিছিল । ইয়াৰ পাচত তেওঁক আৰক্ষীয়ে Yকেটেগৰীৰ নিৰাপত্তা প্ৰদান কৰে ।
সেই অনুসৰি বাবা ছিদ্দিকীৰ সৈতে এজন আৰক্ষী কনিষ্টবল নিয়োজিত আছিল । বাবা ছিদ্দিকীৰ হত্যাকাণ্ডৰ পাচত উত্তৰ-পশ্চিম মুম্বাইৰ খেতৱাড়ী জংচন এলেকাত আৰক্ষীৰ বৃহৎ দল মোতায়েন কৰা হৈছে । বাবা ছিদ্দিকীৰ ওপৰত গুলীচালনা কৰা ঠাইত আৰক্ষীয়ে বেৰিকেড লগাইছে ।
জাতীয়তাবাদী কংগ্ৰেছ দলৰ নেতা বাবা ছিদ্দিকীৰ হত্যাকাণ্ডৰ বিচাৰ ফাষ্ট ট্ৰেক আদালতত হ’ব বুলি মন্তব্য কৰিছে মহাৰাষ্ট্ৰৰ মুখ্যমন্ত্ৰী একনাথ সিন্দেই । মুখ্যমন্ত্রী সিন্দেই এনকাউণ্টাৰ বিশেষজ্ঞ দয়া নায়কে এই ঘটনাৰ তদন্ত কৰিব বুলিও ঘোষণা কৰে ৷
তেওঁ কয়, "মুম্বাই আৰক্ষীক আইন-শৃংখলা বজাই ৰাখিবলৈ নিৰ্দেশ দিয়া হৈছে আৰু তেওঁলোকে চাব লাগে যাতে কোনেও আইন-শৃংখলা হাতত তুলি নলয় । গেং যুদ্ধ পুনৰ সজীৱ হ'ব নালাগে । এনে কাণ্ডত লিপ্ত হোৱাসকলৰ বিৰুদ্ধে কঠোৰ ব্যৱস্থা গ্ৰহণ কৰিব লাগে ।"
ইফালে এনচিপি-এছপিৰ সাংসদ সুপ্ৰিয়া চুলেই এক বিবৃতিত কয়, "চাঞ্চল্যকৰ খবৰ ! বাবা ছিদ্দিকী আৰু নাই । খবৰ অনুসৰি তেওঁক গুলীয়াই হত্যা কৰা হৈছে । শাসকীয় চৰকাৰী মিত্ৰজোঁটৰ এজন সদস্য যেতিয়া নিজৰ পুত্ৰৰ কাৰ্যালয়ত অসুৰক্ষিত আৰু হত্যা কৰা হয় তেতিয়া এইটো একেবাৰে গ্ৰহণযোগ্য নহয় । ই মুম্বাইত মহাৰাষ্ট্ৰৰ আইন-শৃংখলাৰ পৰিস্থিতিৰ বিষয়ে বহু কথাই স্পষ্ট কৰে !"
अतिशय धक्कादायक!
— Supriya Sule (@supriya_sule) October 12, 2024
मुंबईतील माजी आमदार व मंत्री बाबा सिद्दिकी यांच्या हत्येची बातमी अतिशय दुःखद आणि दुर्दैवी आहे. त्यांच्यासारख्या बुजुर्ग नेत्याला भररस्त्यात गोळी झाडून मारण्यात आले. पुणे असो किंवा मुंबई राज्यातील कायदा सुव्यवस्थेची दुर्दशा दाखविणारी ही आणखी एक घटना. बाबा… pic.twitter.com/3M01NqKzvO
এন চি পি-এছ পিৰ বিধায়ক ৰোহিত পাৱাৰে কয়, "জ্যেষ্ঠ নেতা তথা প্ৰাক্তন মন্ত্ৰী বাবা ছিদ্দিকীৰ গুলীচালনাত মৃত্যুৰ খবৰটো অতিশয় চাঞ্চল্যকৰ । ছিদ্দিকী পৰিয়ালৰ ওপৰত যি দুখৰ চাপ পৰিছে, তাৰ সমভাগী । আন্তৰিক শ্ৰদ্ধাঞ্জলি !"
শনিবাৰে কংগ্ৰেছে জাতীয়তাবাদী কংগ্ৰেছ দলৰ নেতা বাবা ছিদ্দিকীৰ হত্যাকাণ্ডৰ বাবে মহাৰাষ্ট্ৰৰ আইন-শৃংখলাৰ পৰিস্থিতিৰ বিৰুদ্ধে গুৰুতৰ অভিযোগ তোলে আৰু এই ঘটনাৰ উপযুক্ত তদন্তৰ দাবী জনায় ।
The tragic demise of Former Maharashtra Minister, Shri Baba Siddique is shocking beyond words.
— Mallikarjun Kharge (@kharge) October 12, 2024
In this hour of grief, I offer my deepest condolences to his family, friends and supporters.
Justice must be ensured, and the present Maharashtra Govt must order a thorough and…
অহা মাহত বিধানসভা নিৰ্বাচন অনুষ্ঠিত হোৱাৰ সম্ভাৱনা থকা ৰাজ্যখনৰ আইন-শৃংখলা পৰিস্থিতিক লৈ বিৰোধীয়ে প্ৰশ্ন উত্থাপন কৰে এই চাঞ্চল্যকৰ ঘটনাৰ পাচত । এক্সত এটা পোষ্টত কংগ্ৰেছৰ সভাপতি মল্লিকাৰ্জুন খাৰ্গেই কয় যে ছিদ্দিকীৰ কৰুণ মৃত্যুক বৰ্ণনা কৰাৰ কোনো ভাষা নাই । ‘‘তেওঁৰ শোকস্তব্ধ পৰিয়াল, বন্ধু-বান্ধৱী আৰু সমৰ্থকসকলৰ প্ৰতি গভীৰ সমবেদনা জ্ঞাপন কৰিছো ।’’ তেওঁ কয় ৷
খাৰ্গেই আৰু কয়, ‘‘ন্যায় নিশ্চিত হ’ব লাগিব, আৰু বৰ্তমানৰ মহাৰাষ্ট্ৰ চৰকাৰে সম্পূৰ্ণ আৰু উপযুক্ত তদন্তৰ নিৰ্দেশ দিব লাগিব । দোষীৰ বিৰুদ্ধে অতি সোনকালে গোচৰ ৰুজু কৰিব লাগিব ।’’
এন চি পিৰ নেতা তথা প্ৰাক্তন মন্ত্ৰী বাবা ছিদ্দিকীৰ ওপৰত শনিবাৰে নিশা বান্দ্ৰাৰ খেটৱাড়ী জংচনৰ ওচৰত আক্ৰমণ সংঘটিত হয় ৷ ষ্ট্ৰীট লাইট বন্ধ হৈ থকাৰ লগতে অঞ্চলটোত চি চি টিভি কেমেৰা নথকাৰ বাবে আন্ধাৰৰ মাজতে সংঘটিত হয় এই গুলীচালনা । (এজেন্সীৰ তথ্য অনুসৰি)
লগতে পঢ়ক: আততায়ীৰ গুলীয়ে বুকু ভেদিলে তিনিবাৰকৈ বিধায়ক নিৰ্বাচিত এইজন ৰাজনৈতিক নেতাৰ; হাস্পতালত মৃত্যু
