ফিৰোজাবাদ : শুকুৰবাৰে নিশা আগ্ৰা-লক্ষ্ণৌ এক্সপ্ৰেছৱেত সংঘটিত হয় এক ভয়াৱহ পথ দুৰ্ঘটনা । এই দুৰ্ঘটনাত পাঁচজন লোক নিহত হয় । আনহাতে, আহত হয় আন ১৫ জন লোক । তেওঁলোকক শিকোহাবাদৰ যুটীয়া চিকিৎসালয়ত ভৰ্তি কৰোৱা হৈছে । দুৰ্ঘটনাটোত পতিত লোকসকল লক্ষ্ণৌৰ বাসিন্দা । তেওঁলোকে চাৰিবছৰীয়া পুত্ৰৰ মুণ্ডন ৰীতি সম্পন্ন কৰি মথুৰাৰ পৰা উভতি আহিছিল । আদবাটতে বাছখনৰ এখন ট্ৰলীৰ সৈতে খুন্দা লাগে ।
ফিৰোজাবাদ জিলাৰ সীমাৰ নাছিৰপুৰ আৰক্ষী থানা অঞ্চলত আগ্ৰা-লক্ষ্ণৌ এক্সপ্ৰেছৱেত এই দুৰ্ঘটনাটো সংঘটিত হয় । লক্ষ্ণৌৰ মহুদ্দিনপুৰৰ বাসিন্দা সন্দীপ নামৰ ব্যক্তিজনৰ পৰিয়াল আৰু আত্মীয়ই তেওঁৰ ৪ বছৰীয়া পুত্ৰ সিদ্ধাৰ্থৰ মুণ্ডন ৰীতি আৰু বৃন্দাবন দৰ্শন কৰিবলৈ এখন ব্যক্তিগত বাছেৰে গৈছিল । তেওঁলোকে মাজনিশা উভতি আহিছিল ।
ফিৰোজাবাদ জিলাৰ সীমাত তেওঁলোকৰ বাছখনে এক্সপ্ৰেছৱেত ৰখাই থোৱা এখন ট্ৰাকত খুন্দা মাৰে । দুৰ্ঘটনাটো যথেষ্ট ভয়ংকৰ আছিল । দুৰ্ঘটনাত পতিত লোকসকলৰ চিঞৰ-বাখৰ কোনোবাই ঘটনাটোৰ বিষয়ে আৰক্ষী নিয়ন্ত্ৰণ কক্ষক অৱগত কৰে ।
তথ্য লাভ কৰাৰ পিচত উদ্ধাৰকাৰী দল আৰু স্থানীয় আৰক্ষী ঘটনাস্থলীত উপস্থিত হয় আৰু বাছখনত আবদ্ধ লোকসকলক উদ্ধাৰ কৰি চিকিৎসাৰ বাবে শিকোহাবাদৰ যুটীয়া চিকিৎসালয়লৈ প্ৰেৰণ কৰে । তাত চিকিৎসকে ৫ জন লোকক মৃত ঘোষণা কৰে । আনসকল বৰ্তমান চিকিৎসাধীন হৈ আছে ।
অতিৰিক্ত আৰক্ষী অধীক্ষক (দেহাট) অখিলেশ ভদোৰিয়াই কয়, "দুৰ্ঘটনাটোত ৫ জন লোকৰ মৃত্যু হৈছে । তেওঁলোক সকলোৱে বাছেৰে মথুৰাৰ পৰা উভতি আহি আছিল । বাছখনে এখন ৰখাই থোৱা ট্ৰাকত খুন্দা মাৰে । এই ক্ষেত্ৰত বাছ চালকজনৰ অসচেতনতা প্ৰকাশ পাইছে । দুৰ্ঘটনাটোৰ কাৰণ হিচাপে চালকজনৰ টোপনি যোৱা বুলি কোৱা হৈছে । তিনিটা মৃতদেহ চিনাক্ত কৰিব পৰা হোৱা নাই ।"
