নেশ্যনেল ডেস্ক, ১৯ মাৰ্চ : ইডিয়ে দাবী কৰা মতে দিল্লীৰ সুৰা নীতিৰ অধীনত বিআৰএছ এমএলচি কে কবিতাই লাভ কৰা লাভালাভৰ বিনিময়ত আপ নেতাসকলক ১০০ কোটি টকা পৰিশোধ কৰিছিল । তেলেংগানাৰ প্ৰাক্তন মুখ্যমন্ত্ৰীৰ কন্যা কে কবিতাক গ্ৰেপ্তাৰৰ পিচতে এই কথা উল্লেখ কৰিছে তদন্তকাৰী সংস্থাটোৱে ।
যোৱা ১৫ মাৰ্চত হায়দৰাবাদত ইডিয়ে বিআৰএছ নেত্ৰী কবিতাক গ্ৰেপ্তাৰ কৰিছিল । সোমবাৰে এক প্ৰেছ বিজ্ঞপ্তিযোগে ইডিয়ে গ্ৰেপ্তাৰ সম্পৰ্কীয় তথ্য প্ৰকাশ কৰিছে । দিল্লীৰ সুৰা নীতি কেলেংকাৰীত গ্ৰেপ্তাৰ হোৱাৰ পিচত দিল্লীৰ পিএমএলএ বিশেষ আদালতে তেওঁক ২৩ মাৰ্চলৈকে ইডিৰ জিম্মালৈ প্ৰেৰণ কৰিছে ।
হায়দৰাবাদত কবিতাৰ ঘৰত এই মাহৰ ১৫ তাৰিখে তালাচী চলোৱা হৈছিল । সেই সময়ত কবিতাৰ আত্মীয় আৰু সহকৰ্মীসকলে ইডি বিষয়াসকলক বাধা দিছিল । ইডিয়ে দাবী কৰা মতে কবিতাই আন একাংশৰ সৈতে দিল্লীৰ সুৰা নীতি প্ৰস্তুত আৰু ৰূপায়ণৰ পৰা লাভান্বিত হ'বলৈ অৰবিন্দ কেজৰিৱাল আৰু মনীষ চিছোদিয়াৰ দৰে শীৰ্ষ আপ নেতাৰ সৈতে ষড়যন্ত্ৰ কৰিছিল ।
ইডিৰ মতে ২০২১-২২ বৰ্ষত দিল্লীৰ সুৰা নীতি প্ৰণয়ন আৰু ৰূপায়ণ দুৰ্নীতি সংঘটিত হৈছিল আৰু পাইকাৰী বিক্ৰেতাৰ পৰা আপ নেতাসকলক নিৰন্তৰ অনুদান দিয়া দেখা গৈছিল । তাৰ পিচত কবিতা আৰু তেওঁৰ অনুগামীসকলে এই গোটেই ঘটনাটোৰ জৰিয়তে লাভ আৰু বে-আইনী উপাৰ্জন লাভ কৰিবলৈ আপ নেতাসকলক পূৰ্ব-পৰিশোধ কৰা অনুদান লাভ কৰাৰ ষড়যন্ত্ৰ কৰিছিল ।
ইডিয়ে এই ক্ষেত্ৰত দিল্লী, হায়দৰাবাদ, চেন্নাই, মুম্বাই আৰু অন্যান্য স্থানৰ লগতে দেশৰ প্ৰায় ২৪৫ টা স্থানত তালাচী চলাইছে । মনীষ চিছোদিয়া, সঞ্জয় সিং আৰু আপৰ বিজয় নায়াৰসহ ১৫ জন লোকক গ্ৰেপ্তাৰ কৰা হৈছে । এখন অভিযোগনামা আৰু ৫ খন পৰিপূৰক অভিযোগনামাও ইডিয়ে দাখিল কৰিছে ।
অভিযানৰ সময়ত ১২৮.৭৯ কোটি টকাৰ সম্পত্তি চিনাক্ত আৰু অস্থায়ীভাৱে জব্দ কৰিছে । ইডিয়ে বিজ্ঞপ্তিত জনোৱা মতে তদন্ত প্ৰক্ৰিয়া এতিয়াও চলি আছে ।
লগতে পঢ়ক : দিল্লীৰ সুৰা নীতি নহয়, আন এক গোচৰত কেজৰিৱালৰ বিৰুদ্ধে ইডিৰ চমন
