নেশ্যনেল ডেস্ক, 17 জুলাই: সোমবাৰে জম্মু-কাশ্মীৰৰ ডোডা জিলাৰ ভাটা ডেছা অঞ্চলৰ উজনি অংশত নিৰাপত্তা বাহিনী আৰু সন্ত্ৰাসবাদীৰ মাজত গুলীয়াগুলী হোৱাৰ ফলত সেনাবাহিনীৰ চাৰিজন বিষয়া-জোৱান শ্বহীদ হয় । ইয়াৰ পাচতো বুধবাৰে তৃতীয়টো দিন পৰ্যন্ত আৰক্ষী-সেনাৰ অভিযানকাৰী দলে উগ্ৰপন্থী নিৰ্মূলৰ লক্ষ্যৰে চলাই আছে অভিযান ৷
প্ৰতিৰক্ষা সূত্ৰই জনোৱা মতে, মঙলবাৰ আৰু বুধবাৰৰ মাজ নিশা দুবাৰকৈ এই গুলীচালনা সংঘটিত হৈছিল আৰু পাঁচ মিনিট ধৰি চলিছিল যদিও কোনো লোকৰ প্ৰাণ বা সম্পত্তিৰ ক্ষতি হোৱাৰ খবৰ পোৱা হোৱা নাই । দেশা বনাঞ্চলত চলি থকা অভিযানৰ সময়ত নিশা 10.45 বজাত খলান ভট্টা বনাঞ্চলত আৰু পুৱতি নিশা 2 বজাত পঞ্চান ভাটাত সেনা-আৰক্ষীৰ অনুসন্ধান দলটোলৈ লক্ষ্য কৰি গুলীচালনা কৰে লুকাই থকা সন্ত্ৰাসবাদীয়ে ।
আজি অভিযানৰ তৃতীয়টো দিন ৷ অঞ্চলটোত বৃহৎ পৰিমাণে নিৰাপত্তা বাহিনী নিয়োগ কৰি সন্ত্ৰাসবাদীক কৰায়ত্ত কৰাৰ বাবে বৃহৎ অনুসন্ধান অভিযান অব্যাহত আছে । সেনাই এই অভিযানত ড্ৰ’নো ব্যৱহাৰ কৰিছে ৷
জম্মু কাশ্মীৰৰ ডোডাৰ দেশা বনাঞ্চলত ভাৰতীয় সেনাৰ কমাণ্ড, আৰক্ষীৰ এছ অ’ জি, আৰু অৰ্ধসামৰিক বাহিনীৰ যুটীয়া দলে সশস্ত্ৰ উগ্ৰপন্থীক নিষ্ক্ৰিয় কৰাৰ বাবে অভিযান চলাইছে । সোমবাৰৰ সন্ধিয়া ডোডা জিলাৰ দেশা বনাঞ্চলত উগ্ৰপন্থী আৰু নিৰাপত্তাৰক্ষীৰ মাজত হোৱা বন্দুকৰ গুলীচালনাৰ সময়ত ভাৰতীয় সেনাৰ চাৰিজন জোৱান নিহত হয় ।
গুলীয়াগুলীৰ ফলত নিহত চাৰিজন জোৱান পশ্চিম বংগৰ দাৰ্জিলিঙৰ কেপ্তেইন ব্রিজেশ থাপা, অন্ধ্ৰ প্রদেশৰ শ্রীকাকুলামৰ নাইক ডি ৰাজেশ, ৰাজস্থানৰ ঝুনঝুনুৰ চিপায় বিজেন্দ্র আৰু চিপায় অজয় ৷ আটাইকেইজন শ্বহীদ 10 ৰাষ্ট্ৰীয় ৰাইফলৰ বিদ্ৰোহ বিৰোধী গোটৰ অন্তৰ্গত । বিগত তিনি সপ্তাহত ডোডাৰ বনাঞ্চলত নিৰাপত্তা বাহিনী আৰু সন্ত্ৰাসবাদীৰ সৈতে জড়িত এয়া তৃতীয়টো বৃহৎ এনকাউণ্টাৰ ।
