নেশ্যনেল ডেস্ক,১৭ ফেব্ৰুৱাৰী: ভাৰতীয় ক্ৰিকেট দলৰ প্ৰাক্তন বাওঁহাতৰ বেটছমেন যুৱৰাজ সিঙৰ সৈতে সম্পৰ্কিত এক গুৰুত্বপূৰ্ণ খবৰে চাঞ্চল্যৰ সৃষ্টি কৰিছে অনুৰাগীৰ মাজত । যুৱৰাজৰ ঘৰত সংঘটিত হৈছে এক চুৰিকাণ্ডৰ ঘটনা । পঞ্চকুলাস্থিতত যুৱৰাজৰ বাসগৃহত চোৰে চলাই চাফাই অভিযান । চোৰে লুট কৰে নগদ ধনৰ লগতে সোণৰ আ-অলংকাৰ ।
ঘটনা সন্দৰ্ভত যুৱৰাজৰ মাতৃ শবনম সিঙে কয় যে, নগদ ৭৫,০০০ টকা আৰু বন্ধ আলমিৰাৰ পৰা সোণৰ আ-অলংকাৰ লুট কৰে চোৰে । চুৰিকাণ্ড সন্দৰ্ভত ঘৰটোত কাম কৰা পুৰণি সেৱকজনক জড়িত থকাৰ সন্দেহ কৰে পৰিয়ালটোৰ লোকে । ইতিমধ্যে আৰক্ষীয়ে এখন এজাহাৰ পঞ্জীয়ন কৰিছে আৰু গোচৰটোৰ সন্দৰ্ভত তদন্ত আৰম্ভ কৰে । এম.ডি.চি. আৰক্ষী থানাৰ এছ.এইচ.ও. ধৰমপাল সিঙে ব্যক্তিগতভাৱে এই উচ্চ-প্ৰফাইল চুৰি গোচৰটো চোৱা-চিতা কৰি আছে বুলি জানিবপৰা গৈছে । এনে পৰিস্থিতিত, চোৰটো শীঘ্ৰে জালত পৰাৰ সম্ভাৱনা প্ৰকট হৈ উঠিছে ।
