নেশ্যনেল ডেস্ক, ৭ জুন: পুনৰ দেশৰ সংসদ ভৱনৰ নিৰাপত্তা ভংগ কৰাৰ চেষ্টাৰ অভিযোগ । সংসদ ভৱনৰ নিৰাপত্তা ভংগ কৰাৰ গোচৰত তিনি শ্ৰমিকক গ্ৰেপ্তাৰ । তিনিওজন কৰ্মীয়ে একেখন আধাৰ কাৰ্ড ব্যৱহাৰ কৰি সংসদত প্ৰৱেশ কৰাৰ চেষ্টা চলাইছিল । সূত্ৰ অনুসৰি, ৪ জুনত তিনি শ্ৰমিকে আই জি-৩ প্ৰৱেশদ্বাৰেৰে প্ৰৱেশ কৰিছিল য'ত মোনিছ আৰু কাছিম নামৰ দুই শ্ৰমিকে ব্যক্তিগত ফটোৰ সৈতে একে আধাৰকাৰ্ড নম্বৰ দেখুৱাইছিল । সূত্ৰসমূহে জনাই যে, তিনিজন লোকক মঙলবাৰে সংসদ ভৱনৰ এখন প্ৰৱেশদ্বাৰত নিৰাপত্তা আৰু পৰিচয়-পত্ৰ পৰীক্ষাৰ সময়ত চি আই এছ এফৰ জোৱানসকলে আটক কৰিছিল । তিনিওজনে তেওঁলোকৰ আধাৰ কাৰ্ড দেখুৱাই সংসদ ভৱন চৌহদত প্ৰৱেশ কৰিবলৈ চেষ্টা কৰিছিল ।
চি আই এছ এফ কৰ্মচাৰীসকলে তেওঁলোকৰ কাৰ্ডৰ তথ্য়ত সন্দেহ হোৱাত সেই সন্দৰ্ভত তদন্ত চলোৱাত সেইবোৰ ভুৱা বুলি প্ৰমাণিত হৈছিল । চি আই এছ এফক শেহতীয়াকৈ চি আৰ পি এফ আৰু দিল্লী আৰক্ষীৰ পৰিৱৰ্তে সংসদ ভৱনত নিৰাপত্তাৰ দায়িত্ব অৰ্পণ কৰা হৈছে । চি আই এছ এফৰ মতে, তিনিওজন কৰ্মীয়ে সংসদ ভৱনৰ তিনি নম্বৰৰ গেটৰ পৰা প্ৰৱেশ কৰিবলৈ চেষ্টা কৰিছিল । কিন্তু তেওঁলোক নিৰাপত্তাৰক্ষীৰ জালত পৰিছিল । আটক কৰাৰ পিচত তিনিওকে দিল্লী আৰক্ষীক গতাই দিয়া হয় ।
বৰ্তমান দিল্লী আৰক্ষীয়ে তিনিওকে জেৰা অব্যাহত ৰাখিছে । আটকাধীন শ্ৰমিক তিনিজন উত্তৰ প্ৰদেশৰ বুলি জানিব পৰা গৈছে । আটকাধীন তিনি শ্ৰমিক ক্ৰমে কাছিম, মনিছ আৰু ছোৱেইব বুলি আৰক্ষীয়ে সদৰী কৰে । আৰক্ষীৰ প্ৰাৰম্ভিক অনুসন্ধানত তথ্য প্ৰকাশ কৰা হোৱা নাই যদিও তিনিজন শ্ৰমিকক ডি ভি প্ৰকল্প কোম্পানীয়ে নিয়োগ কৰা বুলি জানিব পৰা গৈছে । শ্ৰমিকসকল সাংসদসকলৰ বাবে নিৰ্মিত এম পি লাউঞ্জৰ এলেকাৰ কামত নিয়োজিত আছিল ।
