مغربی بنگال میں چار مہینے بعد منعقد ہونے والے اسمبلی انتخابات سے قبل جہاں ایک طرف اپوزیشن جماعتوں کی تیاریاں زوروں پر جاری ہے دوسری جانب حکمراں جماعت ترنمول کانگریس اندرونی انتشار و اختلافات کو دور کرنے کی کوشش میں مصروف ہے۔
مالدہ ضلع ترنمول کانگریس آپسی انتشار کا شکار رہنماؤں کے درمیان لفظی جنگ اور اختلافات کے سبب ممتا بنرجی کی قیادت والی حکمراں جماعت ترنمول کانگریس کی پریشانیوں میں مسلسل اضافہ ہوتا جا رہا ہے۔
ترنمول کانگریس کی سربراہ ممتا بنرجی کی تمام تر کوششوں کے باوجود گزشتہ چند مہینوں سے جاری پارٹی کے رہنماؤں کے درمیان اختلاف ختم ہونے کا نام لے رہا ہے۔
مالدہ ضلع ترنمول کانگریس ان دنوں رہنماؤں کے درمیان آپسی رنجش کے سبب سرخیوں میں ہے۔رہنماؤں کے درمیان اختلاف کی خبریں سامنے آنے سے پارٹی کی سربراہ ممتا بنرجی کی پریشانیوں میں اضافہ ہو گیا ہے۔
مالدہ ضلع ترنمول کانگریس کے جنرل سیکرٹری شیخ حسین نے کہا کہ آپسی رنجش کے سبب انہیں کام کرنے نہیں دیا جا رہا ہے۔ان کے خلاف سازش کی جا رہی ہے۔
انہوں نے کہا کہ ترنمول کانگریس کو نقصان پہنچانے والوں کو آگے بڑھانے کی کوشش کی جا رہی ہے۔برسوں سے پارٹی کے لیے کام کرنے والوں کو نظر انداز کیا جا رہا ہے۔
شیخ حسین نے کہا کہ اسمبلی انتخابات سے عین قبل اس طرح کی حرکت سے ترنمول کانگریس کو نقصان پہنچانے کی کوشش کی جا رہی ہے۔
مالدہ ضلع ترنمول کانگریس کی صدر موسم نور کا کہنا ہے کہ پارٹی میں کوئی اختلاف نہیں ہے۔پارٹی متحد ہے اور اسمبلی انتخابات میں پوری طاقت کے ساتھ انتخابی میدان میں اترے گی۔
انہوں نے کہا کہ ضلع جنرل سیکرٹری شیخ حسین کو عوامی جلسے کو خطاب کرتے ہوئے پارٹی کے اندرونی معاملات کو منظرعام پر لانے سے گریز کرنا چاہیے تھا۔
