CM Mamata Banerjee ملک میں 2024 کے عام انتخابات تبدیلی کےلئے ہوں گے

ترنمول کانگریس کی سربراہ اور وزیراعلیٰ ممتابنرجی نے کہاکہ 2024 عام انتخابات عام لوگوں کے لئے ہی ہوگا۔ بھارت کے عوام 2024 میں ملک میں انقلابی تبدیلی کے لئے اپنے حق رائے دہی کا استعمال کریں گے جس میں بی جے پی کو کراری شکست کا سامنا کرنا پڑے گا۔

کولکاتا:مغربی بنگال کی حکمراں جماعت ترنمول کانگریس کی سربراہ اور وزیراعلیٰ ممتابنرجی نے ٹی ایم سی کے تیسرے مرتبہ اقتدار میں آنے کے دو سال مکمل ہونے پر عوام کو مبارکباد پیش کرتے ہوئے بی جے پی کے خلاف جم کر بھڑاس نکالی۔بی جے پی کو ملک کے لئے خطرہ قرار دیا۔ وزیراعلیٰ ممتابنرجی نے کہاکہ اس میں کوئی شک نہیں ہے کہ 2024 عام انتخابات عام لوگوں کے لئے ہی ہوگا۔بھارت کے عوام 2024 میں ملک میں انقلابی تبدیلی کے لئے اپنے حق رائے دہی کا استعمال کریں گے جس میں بی جے پی کو کراری شکست کا سامنا کرنا پڑے گا۔

ترنمول کانگریس کی سربراہ ممتابنرجی نے کہاکہ مرکز میں ایک ایسی حکومت ہے جو عوام مکو چین سے رہنے نہیں دے رہی ہے۔حکومت کی عوام مخالف پالیسیوں کی وجہ سے عام لوگ پریشان ہیں اور بے یارو مددگار ہیں۔ملک کی تمام ریاست میں لوگ پریشان ہیں۔عام کا غصہ جب پھوٹ پڑے گا تو اس وقت کیا ہو گا کسی کو معلوم نہیں۔ وزیراعلیٰ ممتابنرجی نے کہاکہ 2024 میں عام لوگ ملک میں انقلابی تبدیلی کے لئے ووٹ ڈالیں۔ملک میں تبدیلی کا مطلب بی جے پی کا خاتمہ ہوگا۔

انہوں نے کہا کہ بھارت کے لوگ اس وقت مایوس ہیں۔ اگلے عام انتخابات میں ان کی مایوسی واضح طور پر سامنے آئے گی کیونکہ جمہوریت میں عوام سے بڑھ کر کوئی طاقت نہیں ہوتی ہے۔ عوام کی طاقت ہی جمہوریت کی طاقت ہوتی ہے۔ انہوں نے کہاکہ اقتدار کی طاقت کے نشے میں چور لوگوں نے ایک بار پھر این آر سی کے لئے نوٹیفیکیشن جاری کیا ہے۔جملہ باز حکومت اس سے زیادہ کچھ کر بھی نہیں کرسکتی ہے۔ان کے پاس نوٹ بندی،این آر سی کے نام پر ظلم،مذہب اور نفرت کی سیاست کرنے کے علاوہ کچھ بھی نہیں ہے۔

ممتابنرجی نے تمام اپوزیشن پارٹیوں کو ایک بار پھر ایک پلیٹ فارم پر آنے کی اپیل کرتے ہوئے کہاکہ ہم بی جے پی کو شکست دیں گے اور ملک سے نفرت کی سیاست کو ختم کریں گے۔