مغربی بنگال کے چیف سکریٹری الاپن بنرجی اور بس مالکان کے درمیان بس کے کرائے کو لے کر ایک اہم میٹنگ ہوئی۔چیف سکریٹری اور بس مالکان کے درمیان بس کرائے سمیت متعدد مطالبات کو لے کر تبادلہ خیال کیا گیا۔ دونوں کے درمیان گھنٹوں تک بات چیت جاری رہی۔لیکن کئی گھنٹوں تک بات چیت ہونے کے باوجود کسی بھی مسئلے کا کوئی حل نہیں نکلا، جس پر بس مالکان نے مایوسی کا اظہار کیا ہے۔
مغربی بنگال: چیف سکریٹری اور بس مالکان کے درمیان میٹنگ ناکام ریاستی چیف سکریٹری الاپن بنرجی نے کہا کہ بس مالکان کے ساتھ بات چیت جاری رہے گی۔ فی الحال بس کے کرائے میں اضافے کو لے اتفاق رائے نہیں بن پائی ہے۔جوائنٹ کونسل آف بس سنڈیکیٹ کے جنرل سیکرٹری تپن کمار بنرجی نے کہا کہ پٹرول اور ڈیزل کی قیمتوں میں اضافہ ہونے کے سبب کاروبار چلانا مشکل ہو گیا ہے۔انہوں نے کہا کہ بس کے کرائے میں اضافہ ہی ہمارے مسائل کا واحد حل ہے، اس کے علاوہ اور کوئی دوسرا راستہ نہیں ہے۔
واضح رہے کہ منی بس اور بس مالکان گزشتہ چند مہینوں سے بس کے کرائے میں اضافے کو لے کر حکومت پر مسلسل دباؤ بنائے ہوئے ہیں۔
