مغربی بنگال: تشدد میں بی جے پی کارکن ہلاک

لوک سبھا انتخابات کے چھٹے مرحلے کے لیے آج سات ریاستوں کی 59 نشستوں پر پولنگ جاری ہے، اس دوران تشدد کے واقعات بھی رونما ہوئے۔

مغربی بنگال کی آٹھ نشستوں کے لیے بھی پولنگ جاری ہے لیکن پولنگ شروع ہونے سے قبل بی جے پی کے ایک بوتھ کارکن کا قتل کر دیا گیا۔

یہ واقعہ جھار گرام میں پیش آیا۔
ہلاک ہونے والے کارکن کا نام رمن سنگھ ہے۔
تفصیلات کے مطابق ٹی ایم سی کے کارکنان نے رمن سنگھ کو بری طرح پیٹا جس کی وجہ سے ان کی موت ہوگئی۔

بی جے پی کے کارکن کے علاوہ ترنمول کانگریس (ٹی ایم سی) کے ایک کارکن کی بھی لاش ملی ہے، اس کے علاوہ ٹی ایم سی کے دو کارکنان کو گولی ماری گئی ہے۔

مغربی بنگال میں ووٹنگ کے ساتھ تشدد کا دور بھی عروج پر پہنچا ہوا ہے اور تقریباً ہر انتخابات کے دوران یہاں تشدد کے واقعات رونما ہونا عام بات ہو گئی ہے، اسی اثنا میں مدناپور میں ٹی ایم سی کے دو کارکنان کو گولی مار دی گئی ہے۔

دونوں کارکنوں کو تملوک کے ہسپتال میں داخل کرایا گیا ہے۔

اسی درمیان بیلدا کے ٹی ایم سی کے دفتر پر بھی حملہ ہوا ہے جس کے لیے ٹی ایم سی نے بی جے پی کو ذمہ دار ٹھہرایا ہے۔