مغربی بنگال میں ٹرانسپورٹ تنازعہ برقرار

مغربی بنگال محکمہ ٹرانسپورٹ اورپرائیویٹ بس و منی بس کے مالکان کے درمیان کرائے میں اضافہ کو لے کر جاری تنازعہ ختم ہوتا ہوا نظر نہیں آرہا ہے۔ ریاستی وزیر ٹرانسپورٹ فرہاد حکیم کا کہنا ہے کہ سڑکوں پر پہلے بسیں اتاری جائیں۔ پھر کرائے میں اضافہ کو لے کر بات چیت کی جائے گی۔ پرائیویٹ بس اور منی بس مالکان نے وزیر ٹرانسپورٹ کی اس ہدایت کو نظر انداز کیا ہے۔

پرائیویٹ بس اور منی بس کے مالکان نے جون کے مہینے میں ہی واضح کردیا تھا کہ جب تک بسوں کے کرائے میں اضافہ نہیں کیا جاتا ہے اس وقت تک وہ اپنی بسوں کو سڑکوں پر نہیں اتاریں گے۔ اس کے لئے وہ کسی بھی حد تک جا سکتے ہیں۔

گزشتہ روز وزیر ٹرانسپورٹ فرہاد حکیم نے بس مالکان کے ساتھ میٹنگ ناکام ہونے کے بعد سخت رخ اختیار کرتے ہوئے پرائیویٹ بس اور منی بس کے مالکان کو سڑکوں پر اتارنے کے ہدایت دی تھی۔

امید تھی کہ وزیر ٹرانسپورٹ کی سخت وارننگ کے بعد بس مالکان اپنی بسوں کو سڑکوں پر اتاریں گے۔ تاہم ایسا بالکل نہیں ہوا۔ جنوبی 24 پرگنہ، شمالی 24 پرگنہ، ہوڑہ اور ہگلی میں پرائیویٹ بس اور منی بس سنڈیکیٹ نے چند بسوں کو سڑکوں پر اتارا۔ لیکن زیادہ تر بسوں کو گیراج میں رکھنے کا فیصلہ کیا۔

وزیر ٹرانسپورٹ کی سخت وارننگ کے باوجود پرائیویٹ بس اور منی بس کے مالکان نے اپنی اپنی بسوں کو سڑکوں پر اتارنے سے انکار کر دیا ہے اور وہ کرائے میں اضافہ کو لے کر بضد ہیں۔

حیرت کی بات یہ ہے کہ تمام بس ڈیپو اور اسٹینڈ پر پرائیویٹ بس اور منی بس کے ایک بھی مالک نظر نہیں آئے۔ جزوی طور پر جو بسیں چل رہیں ہیں ان میں زیادہ تر غیر مستقل ملازمین ہیں۔ ان سے جب بات چیت کرنے کی کوشش کی گئی تو انہوں نے کہا کہ ہمیں کچھ بھی معلوم نہیں ہے.