میوٹیشن اور سرٹیفکیٹ کے لئے فیس کی ادائیگی نہیں: فرہاد حکیم

ریاستی وزیر فرہاد حکیم نے کہا کہ زمینوں کے میوٹیشن اور اس سے جڑے پہلے سرٹیفکیٹ کے لئے عام لوگوں کو فیس کی کوئی ادائیگی نہیں کرنی پڑے گی۔

مغربی بنگال کے وزیر فرہاد حکیم نے زمینوں کے میوٹیشن اور اس سے جڑے سرٹیفکیٹ حاصل کرنے کے کاموں کو مزید آسان بنانے کی کوشش تیز کردی ہے۔ کولکاتا میونسپل کارپوریشن کے ایڈمنسٹریٹو بورڈ کے سربراہ فرہاد حکیم نے کہا کہ کاموں کو پیچیدہ بنانے کے بجائے اسے اور آسان بنانے کی کوشش کی جارہی ہے۔

انہوں نے کہا کہ اس سے عام لوگوں کو میوٹیشن اور دوسرے کاموں سے متعلق درپیش پریشانیوں سے نجات دلانے کے لیے منصوبے بنائے گئے ہیں۔ لوگ پریشانیوں سے بچنے کی کوشش کرتے ہیں جس سے زمین کا میوٹیشن وغیرہ کا کام التوا میں رہ جاتا ہے۔

ریاستی وزیر کا کہنا ہے کہ پتہ چلتا ہے کہ کسی گھر کا برسوں برسوں تک میوٹیشن ہوا ہی نہیں ہے۔ کارپوریشن کا عملہ اس ضمن میں زمین کے مالکان کو نوٹس بھیجتے ہیں تو وہ پریشان ہوجاتے ہیں۔

ترنمول کانگریس کے سینئیر رہنما اور وزیر فرہاد حکیم نے کہا کہ زمینوں کے میوٹیشن اور اس سے جڑے پہلے سرٹیفکیٹ کے لئے عام لوگوں کو فیس کی کوئی ادائیگی نہیں کرنی پڑے گی۔

انہوں نے کہا کہ کارپوریشن کے دفتر میں آئیں گے اور آسانی کے ساتھ اپنا کام کراکر چلے جائیں گے اس کے لئے انہیں فیس ادا کرنے کی بھی ضرورت نہیں ہے۔

انہوں نے کہا کہ اس مرحلے کے بعد لوگوں کی پریشانیاں کم ہوجائیں گی اور دوسرے مرحلے میں انہیں معمولی فیس ادا کرنے پڑے گی۔

واضح رہے کہ تیسری مرتبہ اقتدار میں آنے کے بعد وزیر فرہاد حکیم نے متعدد منصوبوں کا اعلان کرکے عام لوگوں کی پریشانیاں کم کرنے کی کوشش کی ہے۔