Bandh At Moyna موئنا میں 12 گھنٹے کا بند جزوی اثر

مشرقی مدنی پور ضلع کے تملوک کے موئنا میں بی جے پی بوتھ صدر کے قتل کے خلاف 12 گھنٹوں کے بند کا ملا جلا اثر دیکھنے کو ملا۔ موئنا علاقے میں جہاں چند دکانیں بند رہیں وہیں دوسری طرف مختلف علاقوں کے بازاروں میں چہل پہل دیکھنے کو ملی۔

مشرقی مدنی پور: مغربی بنگال کے مشرقی مدنا پور ضلع کے موئنا میں بھارتیہ جنتا پارٹی (بی جے پی) پارٹی بوتھ کمیٹی کے صدر وجے کرشنا بھونیا کے اغوا اور قتل کے خلاف بدھ کو بی جے پی کی طرف سے 12 گھنٹے کے بند کی وجہ سے تناؤ برقرار رہا۔ اسمبلی میں حزب اختلاف شوبھندو ادھیکاری نے منگل کو کہا کہ پارٹی بدھ کو صبح سے شام تک موئنا بند منایا جائے گا اور بھوئیان کے مبینہ قتل کی مرکزی تفتیشی بیورو (سی بی آئی) سے تحقیقات کا مطالبہ کیا جائے گا۔ ایمرجنسی خدمات کو بند کے دائرے سے باہر رکھا گیا۔

پولیس کو بند کی حمایت میں سڑکوں پر نکلنے والے مشتعل بی جے پی کارکنوں کو منتشر کرنے کے لیے کئی علاقوں میں لاٹھیوں کا استعمال کرنا پڑا۔ مقامی بی جے پی ایم ایل اے اور سابق کرکٹر اشوک ڈنڈا نے بند کی حمایت میں ایک بڑی بائیک ریلی نکالی اور بعد میں بلاک ڈیولپمنٹ آفیسر سے ملاقات کی۔ پولیس ابھی تک قتل کے ملزمان کا پتہ نہیں لگا سکی۔ بی جے پی نے مبینہ اغوا اور قتل کے لیے حکمراں ترنمول کانگریس پر انگلی اٹھائی ہیں۔وہیں ترنمول کانگریس نے اس معاملے میں اپنے ملوث ہونے سے انکار کرتے ہوئے کہا کہ بھوئیاں کی موت مبینہ خاندانی تنازعہ کی وجہ سے ہوئی ہے۔

واضح رہے کہ گزشتہ پیر کی رات بی جے پی بوتھ کمیٹی کے صدر وجے کرشنا (60) کا قتل کردیا گیا تھا۔اس کیلئے ترنمول کانگریس کو ذمہ دار ٹھہرایا جارہا ہے۔یہ واقعہ مینار کے بکا پنچایت کے گورمھل علاقے میں پیش آیا۔ اس کی وجہ سے علاقے میں کشیدگی پھیل گئی۔ وجے کرشنا کو پیر کو مبینہ طور پر اغوا کیا گیا تھا اور بعد میں قتل کر دیا گیا تھا۔