پارٹی میں کوئی بڑا چھوٹا نہیں: ممتا بنرجی

ترنمول کانگریس کی سربراہ اور وزیراعلی ممتابنرجی نے کہا کہ پارٹی میں کوئی بڑا اور چھوٹا نہیں ہے، سب برابر ہیں۔

مغربی بنگال کی حکمراں جماعت ترنمول کانگریس کی سربراہ ممتابنرجی نے پارٹی میں اختلاف کی خبر کو بے بنیاد قرار دیتے ہوئے کہا کہ ہم سب ایک اور متحد ہیں۔

وزیراعلی ممتابنرجی نے کہا کہ پارٹی میں کوئی بڑا اور چھوٹا نہیں ہے۔ سب کی حیثیت برابر ہے۔ ہم جب عوام کی خدمت کرنے کے لئے پارٹی میں شامل ہوئے ہیں تو اس میں عام و خاص کی کیا بات ہے۔ ترنمول کانگریس کی سربراہ کے مطابق پارٹی کے تمام کارکنان ایک ہیں اور متحد ہو کر بنگال کے عوام کی خدمت انجام دینے کے لئے پرعزم ہیں.

ممتابنرجی نے کہا کہ ترنمول کانگریس ماں ماٹی مانش کی سیاسی جماعت ہے۔ اس میں اتنی جلد دراڑ پڑنے والی نہیں ہے۔ کئی لوگ اس کے لئے کوشش کر کے ہار مان چکے ہیں اور چند جلد ہی شکست سے دوچار ہونے والے ہیں.

انہوں نے کہا کہ اگر آپ کی پارٹی عوام میں اتنی ہی مقبول ہے تو پھر توڑ پھوڑ کرنے کی کوشش کیوں کی جاتی ہے؟۔

ترنمول کی سربراہ کا کہنا ہے کہ پارٹی کے اندر اور باہر کیا چل رہا ہے سب معلوم ہے. کون کس کو فون کرتا اور کون کس پارٹی کے رابطہ میں ہے میرے پاس تمام جانکاریاں موجود ہیں ہے۔

واضح رہے کہ مغربی بنگال کی وزیراعلی ممتابنرجی ان دنوں بانکوڑہ ضلع کے دورے پر ہیں۔