بی جے پی سے پیسے لے کر اقلیتوں کا ووٹ ہڑپنے کے ممتا بنرجی کے الزام پر اے آئی ایم آئی ایم کے سربراہ اسدالدین اویسی نے شدید رد عمل دیا ہے۔ اویسی نے کہا کہ پیسے سے اسد الدین اویسی کو خریدنے والا کوئی انسان آج تک پیدا ہی نہیں ہوا۔
ایم آئی ایم کے سربراہ نے ممتا بنرجی کے الزام کو بے بنیاد قرار دیتے ہوئے کہا کہ وہ بے چین ہیں۔ انہیں اپنے گھر کی فکر ہونی چاہئے، ان کے لوگ بی جے پی میں شامل ہو رہے ہیں۔ وہ بہار کے ووٹروں اور جنہوں نے ہمیں ووٹ دیا ان سب کی توہین کر رہی ہیں۔
'اسد الدین اویسی کو پیسے سے خریدنے والا کوئی پیدا نہیں ہوا' اس سے قبل مغربی بنگال کی وزیر اعلیٰ ممتا بنرجی نے جلپائی گڑی میں ایک ریلی سے خطاب کرتے ہوئے ایم آئی ایم پر بی جے پی سے پیسے لے کر مسلم ووٹوں کو تقسیم کرنے کا الزام عائد کیا۔ انہوں نے کہا کہ ریاست کے مسلم ووٹوں کو تقسیم کرنے کے مقصد سے حیدرآباد کی ایک پارٹی کو یہاں لانے کی خاطر بی جے پی کروڑوں روپے خرچ کر ہی ہے۔
مزید پڑھیں:
وزیر اعلیٰ نے مزید کہا کہ بی جے پی کا منصوبہ ہے کہ ہندو ووٹ بی جے پی کے کھاتے میں چلے جائیں اور مسلم ووٹ حیدرآباد کی پارتی کو مل جائیں۔ انہوں نے کہا کہ حال ہی میں بہار میں ہوئے انتخابات میں بھی انہوں نے یہی کیا تھا۔ ممتا بنرجی نے ایم آئی ایم کو بی جے پی کی بی ٹیم قرار دیا۔ واضح رہے کہ مغربی بنگال کی 294رکنی اسمبلی کے لیے آئندہ سال اپریل-مئی میں انتخابات ہونے ہیں۔