شمالی دیناج پور:مغربی بنگال کے شمالی دیناج پور کے اسلام پور سے رکن اسمبلی کریم چودھری نے کہا کہ اس وقت تک وہ اپنے باغی تیور کو ترک نہیں کریں گے جب تک ان کی تجویز پر عملدرآمد نہیں ہوگا۔ کیونکہ انہوں نے پارٹی کے حق میں تجویز دی ہے۔ دوسری طرف ضلع ترنمول کانگریس کے صدر کنیا لال اگروال نے کہا کہ رکن اسمبلی سے ملاقات کے دوران دوستانہ بات چیت ہوئی۔ وہ بات چیت کی مکمل رپورٹ پارٹی کے اعلیٰ کمان کو دیں گے۔امید ہے کہ بزرگ سیاسی رہنما کی ناراضگی دور ہو جائے گی۔
واضح رہے کہ گزشتہ کچھ دنوں سے اسلام پور کے رکن اسمبلی عبدالکریم چودھری اور ضلع صدر کنیا لال اگروال کے درمیان تنازع انتہا کو پہنچ گیا تھا۔ ترنمول کانگریس اسلام پور بلاک صدر ذاکر حسین کو ذمہ داری سونپتے ہی یہ تنازعہ مزید بڑھ گیا ہے۔ بلاک صدر ذاکر حسین کے حامیوں پر حال ہی میں ایک سویک والنٹیر پر حملہ کرنے کا الزام ہے ۔ الزام ہے کہ تھانے میں اس کے خلاف تحریری شکایت درج کرانے کے باوجود پولیس اس کے خلاف کوئی کارروائی نہیں کررہی ہے۔