'ممتا بنرجی کے رہتے اقلیتوں کو ڈرایا نہیں جاسکتا'

مغربی بنگال کے وزیر فرہاد حکیم کے مطابق بی جے پی لاکھ کوشش کر لے وہ اقتدار میں آنے والی نہیں ہے اور بنگال کے عوام ہی بی جے پی کو روک کر دکھائیں گے'۔

مغربی بنگال کے شہری ترقیاتی وزیر فرہاد حکیم نے کہا کہ ریاست میں تمام مذاہب کے لوگ مل جل کر خوش اور پر امن طریقے سے رہتے ہیں۔ انہوں نے کہا کہ چند لوگ اقتدار میں آنے کے لئے ریاست کے پرامن ماحول کو بگاڑنے کی کوشش میں مصروف ہیں۔ اس سے عام لوگوں کو پریشانی ہو سکتی ہے۔ فرہاد حکیم نے کہا کہ وزیراعلی ممتابنرجی کے رہتے ہوئے اقلیتی طبقے کو کوئی ڈرا دھمکا نہیں سکتا ہے۔

ترنمول کانگریس سینئر رہنما کا کہنا ہے کہ اگر کوئی اس کی ہمت کرے گا تو عوام انہیں اس کا جواب دیں گے۔ انہوں نے کہا کہ مغربی بنگال کے عوام نے ممتابنرجی کو حکومت چلانے کی ذمہ داری دی ہے۔' 2021 میں بھی یہ ذمہ داری ہمارے پاس ہی رہنے والی ہے۔ ریاستی وزیر کے مطابق بی جے پی لاکھ کوشش کرلے وہ اقتدار میں آنے والی نہیں ہے اور بنگال کے عوام ہی بی جے پی کو روک کر دکھائیں گے'۔

کولکاتا میونسپل کارپوریشن کے چیف ایڈمنسٹریٹیو فرہاد حکیم نے کہا کہ اقتدار میں آنے کا خواب دیکھنے والی بی جے پی کے پاس ایک بھی رہنما نہیں ہے۔ انہوں نے کہا کہ بی جے پی کی حمایت کے لئے بیرون ریاستوں سے کارکنوں کو بنگال بھیجا جا رہا ہے۔انھوں نے مزید کہا کہ بنگال کے لوگوں کو بی جے پی کی ضرورت نہیں ہے۔