ریاست مغربی بنگال کے وزیر ہمایوں کبیر کے میونسپلٹی انتخابات میں کامیابی نہیں ملنے کی صورت میں بہرامپور کے باشندوں کو خمیازہ بھگتنا پڑے کے متنازع بیان پر مرشدآباد ضلع کانگریس اور بی جے پی نے سختی برہمی کا اظہار کیا ہے.
مرشدآباد ضلع کے بہرامپور میں ایک جلسے کو خطاب کرتے ہوئے ریاستی وزیر ہمایوں کبیر نے کہا کہ اسمبلی انتخابات 2021 میں ممتابنرجی کی قیادت والی سیاسی جماعت ترنمول کو تاریخی جیت ملی. اس کے بعد ضمنی انتخابات میں ترنمول کانگریس کو تین میں تین سیٹیں ملیں. یہ ہماری اب تک کی سب سے بڑی کامیابی ہے.
ریٹائرڈ آئی پی ایس آفیسر اور موجودہ وزیر ہمایوں کبیر نے کہا کہ چند مہینوں بعد میونسپلٹی انتخابات ہونے والے ہیں. ہمیں یقین ہے کہ بلدیاتی انتخابات میں بھی ترنمول کانگریس کو تمام سیٹوں پر جیت ملے گی.
انہوں نے کہا کہ بہرام پور میونسپلٹی کی 28 نشستوں پر بھی کامیابی چاہئے. اگر ہم اپوزیشن کا صفایا نہیں کر سکے تو اس کے لئے عوام ذمہ دار ہوں گے۔
ان کا کہنا ہے کہ بہرامپور میونسپلٹی پر قبضہ ترنمول کانگریس کا واحد مقصد ہے اور ہم اس کے لئے کچھ بھی کر سکتے ہیں۔عوام پر سب کچھ چھوڑ دیا گیا ہے کیونکہ ہمیں پتہ ہے کہ ان کا فیصلہ ہمارے حق میں ہی آئے گا۔
انہوں نے مزید کہا کہ کانگریس اور بی جے پی کے درمیان خفیہ سمجھوتہ ہے۔ اس خفیہ سمجھوتے اور منصوبے کو ہر حال میں ناکام بنانا ہوگا۔
ریاستی وزیر نے عوامی جلسے سے خطاب کرتے ہوئے کہا کہ اگر کسی بھی وجہ سے ترنمول کانگریس کا بہرامپور میونسپلٹی پر قبضہ نہیں ہو سکا تو اس علاقے میں رہنے والے لوگوں کو اس کا خمیازہ بھگتنا پڑے گا۔
مرشدآباد ضلع کانگریس کے ترجمان جینتا کا کہنا ہے کہ ترنمول کانگریس کی ڈرا دھمکا کر اقتدار میں آنے کی عادت بن گئی ہے۔ لیکن بہرامپور کے عوام اس کا فیصلہ کریں گے کیونکہ وہ ادھیر رنجن چودھری کا ساتھ کبھی نہیں چھوڑیں گے۔
مزید پڑھیں: