مغربی بنگال کے تہوار 'جمائی ششٹھی' کے اس موقع پر بنگالی فیملی اپنے داماد کو گھر پر مدعو کرتی ہے اور اس کی خاص خاطر تواضع کی جاتی ہے۔ 'جمائی ششٹھی' کے موقع پر داماد آم اور لیچی لے کر اپنے سسرال جاتے ہیں۔ یہ روایت صدیوں پرانی ہے اور یہ تہوار آج بھی بڑے جوش و خروش کے ساتھ منایا جاتا ہے۔ تہوار کے موقع کولکاتا اور اس کے اطراف کے اضلاع میں بازاروں میں ضروری اشیا کی قیمتوں میں بے تحاشہ اضافہ ہوا ہے جس سے عام لوگوں کو بڑی دشواریوں کا سامنا کرنا پڑ رہا ہے۔
کولکاتا اور اس کے اطراف کے بازاروں میں اس وقت آم 280 تا 320 روپے کلو فروخت ہورہا ہے۔دو دنوں پہلے اس کی قیمتیں 80 روپے تا 120 روپے تک تھی۔ اس کے علاوہ لیچی کی قیمتوں میں زبردست اضافہ درج کیا گیا ہے۔ روہو مچھلی 280 سے 300 روپے کلو، کتلا ڈھائی سو روپے تا تین سو روپے، مانگور 190 تا 240 روپے کلو فروخت ہو رہی ہے۔ دکانداروں کا کہنا ہے کہ 'جمائی ششٹھی' کی وجہ سے بازاروں میں ضروری اشیاء کی قیمتوں میں اضافہ ہوا ہے جس کی وجہ سے خریدار نہیں ہیں۔ تہوار کے موقع پر بھی بازاروں میں سناٹا چھایا ہوا ہے۔