کولکاتا: مغربی بنگال میں ایس ایس سی کے ذریعہ اپر پرائمیری اور پرائمیری اسکولوں میں اساتذہ کی تقرری میں بدعنوانی کی جانچ جاری ہے۔ جانچ کا دائرہ جیسے جیسے وسیع ہوتا جارہا ہے ویسے حکمراں جماعت ترنمول کانگریس کی پریشانیاں مزید بڑھتی جا رہی ہیں۔ ایس ایس سی اسکام کی جانچ میں مصروف سی بی آئی نے اساتذہ تقرری میں بدعنوانی معاملے میں براہ راست بورڈ آف پرائمری ایجوکیشن کو خط بھیج کر 2016-2017، 2018 میں ہوئی تقرری سے متعلق تفصیل طلب کی ہے۔
2014 کے ٹی ای ٹی کی بنیاد پر، سی بی آئی نے تمام پرائمری اساتذہ کی فہرست طلب کی ہیں۔ سی بی آئی کی طرف سے بھیجے گئے خط میں ضلع وار فہرست طلب کی گئی ہے۔ خط میں کہا گیا ہے کہ تعینات ہونے والے امیدواروں کا نام، رول نمبر اور رابطہ نمبر بھی بورڈ آف پرائمری ایجوکیشن فراہم کرے۔ مرکزی تفتیشی ایجنسی نے خط میں اس فہرست کا بھی ذکر کیا ہے کہ مختلف اضلاع کی جانب سے ان دستاویزات کے ساتھ کب، کس دن، کتنے دنوں میں سی بی آئی کے دفتر آنا ہے۔