بی جے پی نے'بنگال بچاؤ ہفتہ'منانے کا اعلان کیا

مغربی بنگال حکومت نے 16 اگست کو ’’کھیلا ہوبے ‘‘ کا دن منانے کا اعلان کررکھا ہے۔ اس کے جواب میں بی جے پی نے 9اگست سے 16اگست تک بنگال بچاو ہفتہ منانے کا اعلان کیا ہے۔

بی جے پی کے ذرائع کے مطابق 9اگست جو بھارت چھوڑو تحریک کا دن بھی ہے، سے ایک ہفتہ بنگال بھر میں بنگال بچاو دیوس منایا جائے گا۔بی جے پی یوتھ فرنٹ کے رہنما 9اگست کو جلوس نکالیں گے۔بی جے پی نے کہا کہ بنگال میں انتخابی نتائج آنے کے بعد سے ہی تشدد کے واقعات ہورہے ہیں۔بی جے پی رہنماوں اور ورکروں کو نشانہ بنایا جارہا ہے۔

بی جے پی نے اس سے قبل آشیرواد یاترا کا نکالنے کا اعلان کیا تھا۔اس پروگرام کے تحت چار مرکزی وزرا سبھاش سرکار، جان برلا، شانتانو ٹھاکر اور نشیت پرمانک تشدد کے شکار پارٹی کارکنان اور ورکروں کے گھر جاکر ملاقات کریں گے۔اس دورے کے دوران متعلقہ علاقے کے ارکان پارلیمان و ارکان اسمبلی بھی ساتھ میں موجود رہیں گے ۔یہ پروگرام اگست کے مہینے تک جاری رہے گا۔

دوسری جانب ترنمول کانگریس کے ترجمان کنال گھوش نے کہا کہ بی جے پی اگست میں انقلاب کی بات کررہی ہے مگر انہیں مئی میں آیا انقلاب برداشت نہیں ہورہا ہے۔انہوں نے کہا کہ بی جے پی کو عوامی مسائل کی فکر نہیں ہے ۔مہنگائی میں بے تحاشا اضافہ ہوا ہے۔

یواین آئی