امفان طوفان سے نقصان، حسینہ نے ممتا کو فون کیا

بنگلہ دیش کی وزیر اعظم شیخ حسینہ نے مغربی بنگال کی وزیر اعلی ممتا بنرجی کو فون کرکے ان سے ریاست میں گردابی طوفان ’امفان‘ کی وجہ سے ہوئے نقصان کے بارے میں بات چیت کی۔

بنگلہ دیش کی وزیر اعظم شیخ حسینہ کے پریس سیکریٹری احسان الکریم نے میڈیا کو بتایا کہ وزیر اعظم نے صبح تقریباً 11 بجکر 10 منٹ پر محترمہ بنرجی کو فون کیا اور ریاست میں طوفان کی وجہ سے ہوئے نقصان کے بارے میں بات چیت کی۔

محترمہ حسینہ نے ریاست میں جان و مال کے نقصان پر ہمدردی کا اظہار کیا اور امید ظاہر کی کہ بھارت جلد ہی اس سے نکل آئے گا۔ محترمہ بنرجی نے تشویش ظاہر کرنے کے لیے بنگلہ دیشی وزیر اعظم کا شکریہ ادا کیا۔

خیال رہے کہ امفان بدھ کی شام مغربی بنگال اور بنگلہ دیش کے ساحل سے ٹکرایا تھا۔ مغربی بنگال میں اس کی وجہ سے 80 سے زیادہ لوگوں کی موت ہوگئی اور املاک اور فصلوں کو بھی نقصان پہنچا ہے۔