ریلوے اسٹیشنز کے سائن بورڈز سے اردو نہیں ہٹائی جائے گی

ریلوے نے واضح کیا کہ اتراکھنڈ کے ریلوے اسٹیشنز کے سائن بورڈز سے اردو زبان نہیں ہٹائی جائے گی اور ایک اضافی زبان کے طور پر اسٹیشنوں کے نام سنسکرت میں لکھے جائیں گے۔

شمالی ریلوے کے چیف افسر تعلقات عامہ دیپک کمار نے یہاں بتایا کہ مختلف اخبارات میں اتراکھنڈ میں ریلوے اسٹیشنز کے سائن بورڈز سے اردو زبان کو ہٹانے کے سلسلہ میں شائع خبر کے ضمن میں یہ واضح کیا جاتا ہے کہ بھارتی ریلوے نے کسی بھی اسٹیشن سے نہ تو اردو زبان کو ہٹایا ہے اور نہ ہی ایسا کرنے کا کوئی ارادہ ہے۔

کمار نے کہا کہ سنسکرت زبان کو ریلوے اسٹیشنز پر لگے سائن بورڈز پر ایک اضافی زبان کے طور پر لکھا جا سکتا ہے لیکن اسے اردو زبان کو ہٹا کر نہیں لکھا جائے گا۔

انہوں نے کہا کہ یہ ہدایت بورڈز، سائن بورڈز، نام کی تختیوں پر زبانوں کے استعمال سے متعلق ریلوے بورڈ کے سرکلر اور وزارت داخلہ کے میمو کے مطابق ہے۔