اتراکھنڈ کے ہر بلاک میں کیندریہ ودیالیہ کھولا جائے گا: مرکزی وزیر تعلیم

ریاست اتراکھنڈ میں تعلیمی نظام کی تصویر مکمل طور پر بدلنے والی ہے۔ریاست کے ہر بلاک میں ایک کیندریہ ودیالیہ قائم کیا جائیگا۔مرکزی وزیرتعلیم رمیش پوکھریال نشنک کا کہنا ہے کہ اس سے ریاست کی تصویر بدل جائے گی۔

اتراکھنڈ کے دور دراز پہاڑی علاقوں سے تیزی سے ہورہی نقل مکانی کی بڑی وجہ یہ ہے کہ وہاں معیاری تعلیم کی کمی ہے۔ایسی صورتحال میں ریاست کے ان علاقوں میں تعلیم کے معیار کو بہتر بنانے کے لئے مرکزی حکومت کی پہل پر ہر بلاک میں ایک کیندریہ ودیالیہ کو کھولا جائے گا۔

مرکزی وزیرتعلیم ڈاکٹر رمیش پوکھریال نشنک نے بتایا کہ مرکزی حکومت کی ہدایت پر ہر بلاک میں کیندریہ ودیالیہ کو کھولا جائے گا۔یہ منصوبہ اتراکھنڈ سے شروع ہونے جارہا ہے ، جس پر خود وزیر اعظم نریندر مودی نظر رکھیں گے۔

دوسری طرف نئی تعلیمی پالیسی کے بارے میں بات کرتے ہوئے ڈاکٹر رمیش پوکھریال نشنک کا کہنا ہے کہ اس سے اتراکھنڈ میں تعلیم کے معیار میں ایک بڑی تبدیلی دیکھنے کو ملے گی۔

نئی تعلیمی پالیسی اتراکھنڈ کے لئے نعمت ثابت ہوگی۔ اس کے ذریعے پیشہ ورانہ تعلیم اور مہارت کی ترقی کو فروغ دیا جائے گا ، جو نقل مکانی کو روکنے میں بھی کافی حد تک مددگار ثابت ہوگا۔