روڑکی: اترا کھنڈ کے روڑکی کے گنگنہار کوتوالی علاقے کے سرکڑی گاؤں میں نماز پڑھنے کے معاملے پر مسلمانوں کے دو گروپ آپس میں لڑ پڑے۔ چھڑپ کے دوران پتھراؤ بھی ہوا۔ سنگ باری کے سبب چار افراد زخمی ہو گئے۔ واقعے کے بعد موقعے پر پہنچی پولیس نے کسی طرح معاملہ پر قابو پالیا۔ سکیورٹی کے نقطہ نظر سے گاؤں میں پولیس فورس تعینات کی گئی ہے۔ زخمیوں کو علاج کے لیے سول اسپتال منتقل کردیا گیا ہے۔ زخمیوں میں سے ایک کی حالت نازک دیکھتے ہوئے اسپتال کے ڈاکٹروں نے اسے ہائر سینٹر ریفر کردیا ہے۔
ذرائع کے مطابق گنگنہہر کوتوالی علاقے کے سرکڑی گاؤں میں بدھ کی دیر رات مسجد میں نماز پڑھی جا رہی تھی۔ اسی دوران ساحل اور شکیب گروپ کے درمیان جھگڑا ہوگیا۔ ایک فریق نے دوسرے پر یہ الزام عائد کیا کہ اس نے نماز کے دوران خلل ڈالا۔ جیسے ہی لوگ نماز پڑھ کر مسجد سے باہر آئے تو دونوں فریق آپس میں دست و گریباں ہوگئے۔ کچھ ہی دیر میں دونوں فریقوں کے درمیان شدید لڑائی چھڑ گئی۔ لوگوں نے ایک دوسرے پر جم کر پتھر پھینکے۔