ریاست اترپردیش کی یوگی حکومت نے آج اپنے دور اقتدار کا آخری بجٹ پیش کیا ہے جس کو حزب اختلاف کے رہنماؤں نے مایوس کن بتاتے ہوئے کہا کہ اس بجٹ میں کسانوں اور مزدوروں کے لئے کچھ نہیں ہے۔
وہیں سماج وادی پارٹی اور کانگریس کے رہنماؤں نے حکومت پر الزام عائد کرتے ہوئے کہا کہ حکومت کا آخری بجٹ ہونے کے باوجود اس میں کچھ نہیں ہے جس سے عوام میں ناامیدی ہے۔
سماج وادی پارٹی کے رہنما اور سابق ریاستی وزیر اروند سنگھ گوپ نے بجٹ کے آنے کے بعد دعویٰ کیا ہے کہ ریاست میں آئندہ حکومت اکھلیش یادو کی بنے گی۔
انہوں نے یوگی حکومت کے بجٹ پر ردعمل کا اظہار کرتے ہوئے کہا کہ ابھی حال ہی میں مرکزی حکومت کا عام بجٹ آیا تھا وہ بھی کھوکھلا تھا اور اب ریاستی حکومت کا بجٹ بھی کھوکھلا ہے۔