'منی منجری کے لواحقین کو انصاف دیا جائے'

کانگریس کی اترپردیش کی انچارج اور جنرل سکریٹری پرینکا گاندھی واڈرا نے وزیراعلی یوگی آدتیہ ناتھ سے سیول سروس افسر منی منجری کی موت کی جانچ کا مطالبہ کرتے ہوئے ان کے گھر والوں کو انصاف دینے کی اپیل کی ہے۔

پرینکا گاندھی واڈرا نے اتوار کو جاری ایک بیان میں کہا کہ منی منجری رائے ایک ایماندار افسر تھیں۔ وہ اپنے محکمے کے کام کرنے کے طریقے اور نظام پر سوال اٹھاتی تھیں لیکن ہم نے انہیں کھودیا ہے۔

انہوں نے کہا 'بلیا میں تعینات پی سی ایس افسر منی منجری رائے کے ساتھ اچانک ہوئے اس واقعہ سے ان کے گھروالے پریشان ہیں۔ ان کا کہنا ہے کہ اس کی منصفانہ جانچ ہونی چاہیے'۔

محترمہ واڈرا نے کہا 'میں نے اترپردیش کے وزیراعلی جی کو خط لکھ کر اس میں ایک منصفانہ جانچ کرکے سبھی حقائق کو سامنے لانے کی درخواست کی ہے۔ امید ہے کہ منی منجری جی کے گھروالوں کو انصاف ملے گا'۔