اتر پردیش کانگریس کے اقلیتی محکمہ کے چیئرمین شاہنواز عالم نے وزیر اعلی یوگی آدتیہ ناتھ پر گورکھ ناتھ کے پڑوس میں آباد مسلم خاندانوں پر دباؤ ڈال کر اراضی پر قبضہ کرنے کا الزام عائد کیا ہے۔ انہوں نے اسے سنت گورکھناتھ کی تعلیمات کے خلاف مذہب مخالف سلوک بھی قرار دیا ہے۔
شاہنواز عالم نے بتایا کہ انتظامیہ کو 125 سال سے آباد مسلمان خاندانوں کے رضامندی کا ایک خط ملا، جس پر واقع گاؤں ٹپا پرگنہ حویلی کے قریب زمین خالی کرنے کی رضامندی پر ضلع انتظامیہ نے دستخط کروا لیے ہیں جبکہ گاؤں کے لوگ اپنے گھر خالی نہیں کرنا چاہتے۔
انہوں نے کہا کہ وہاں کے ڈی ایم وجیندر پاندیان لوگوں کو انصاف دلانے کے بجائے صحافیوں پر این ایس اے لگانے کی دھمکی دے رہے ہیں۔ ڈی ایم وجیندر پانڈیان نہ صرف زبردستی دستخط لینے کے معاملے کی تردید کررہے ہیں بلکہ اس خبر کو چلانے والے صحافیوں پر بھی این ایس اے لگانے کی بات کر رہے ہیں۔
شاہنواز عالم نے گورکھپور ڈی ایم کو فوری معطل کرنے اور پورے واقعے کی عدالتی تحقیقات کا مطالبہ کیا ہے۔ اُنہوں نے کہا کہ وزیر اعلی کو اپنے عہدے اور سنت گورکھناتھ کی عظمت کو مدنظر رکھتے ہوئے اس طرح کے غیر اخلاقی اور جمہوری مخالف کام نہیں کرنا چاہئے۔
کانگریسی لیڈر نے کہا کہ یوگی جی کو زمین پر قبضہ کرنے کے بجائے اپنے لوگوں کو کورونا سے بچانے کے لئے ہسپتال، آکسیجن اور ویکسین کا انتظام کرنے میں توانائی لگانی چاہئے۔
