مئو: بجلی سپلائی کی خراب صورتحال، بنکر کاروبار پر منفی اثر

مئو ضلع میں بجلی کی خراب صورتحال سے بنکروں کا کاروبار شدید متاثر ہو رہا ہے۔ بنکروں کا مطالبہ ہے کہ بجلی سپلائی کی صورت حال بہتر کی جائے، جس سے ان کا کاروبار متاثر نا ہو۔

مئو ضلع کی شناخت بنکر صنعت کے اہم مراکز میں ہوتی ہے۔ ضلع کے بیشتر قصبے بنکروں کی کثیر آبادی پر مشتمل ہیں۔ مئو میں ابتدائی دور سے نصب ہینڈلوم کی جگہ اب پاور لوم نے لے لی ہے۔ پاور لوم صنعت کے لئے بجلی کی بہتر سپلائی نہایت ضروری ہے، لیکن گزشتہ کچھ ماہ سے مئو ضلع کے چھوٹے قصبوں میں بجلی سپلائی بے حد ناقص ہو گئی ہے۔ اس کا براہ راست اثر بنکروں کے کاروبار پر ہو رہا ہے۔

مئو ضلع کے محمد آباد گوہنا، ادری ٹاؤن ایریا، خیرآباد، گھوسی سمیت تقریباً ایک درجن قصبوں میں بنکروں کی کثیر آبادی مقیم ہے۔ یہاں بنکر کا کاروبار بڑے پیمانے پر کیا جاتا ہے۔

بنکروں کے کاروبار کی بہتری پر ہی یہاں کے باشندوں کی آمدنی منحصر ہے۔ بجلی کی خراب صورتحال سے یہاں کے بنکروں کے کاروبار پر منفی اثرات مرتب ہو رہے ہیں۔

مقامی بنکروں کی عام شکایت ہے کہ 12 گھنٹے سے بھی کم وقت کے لئے بجلی فراہم کی جارہی ہے۔ کہیں کہیں پر تو صرف آٹھ سے دس گھنٹے ہی بجلی میسر ہو رہی ہے۔ یہ بجلی سپلائی بھی متواتر نہیں مل رہی ہے۔ ان حالات سے بنکر کافی پریشان ہیں۔

بنکر کاروبار پر منفی اثر

خاص طور پر بنکروں کا نوجوان طبقہ جو کہ اپنے کاروبار کو ترقی کی راہ پر گامزن کرنا چاہتا ہے، زیادہ پریشان ہیں۔ جس کے لئے بنکروں کا کاروبار ہی معاشی تنگی سے نجات پانے کا واحد ذریعہ ہے۔

بنکر حکومت سے بجلی فراہمی کو بہتر بنانے کا مطالبہ کر رہے ہیں، لیکن حالات جوں کے توں ہیں۔