مسروقہ گاڑیوں سمیت چور گرفتار

سہارنپور علاقے کے فتح پور میں پولیس کو بڑی کامیابی حاصل ہوئی، پولیس نے شاطر گاڑی چوروں کو گرفتار کر کے ان کے پاس سے چوری کی دو کار اور 9 موٹر سائیکلیں برآمد کی ہیں، گرفتار شدہ چوروں کے دو دیگر ساتھی موقع سے فرار ہونے میں کامیاب ہوگئے۔

اس سلسلے میں ایس پی دیہات ودیا ساگر مشر نے بتایا کہ فتح پور پولیس نے شاطر چور گروہ کے دو ارکان کو کار اور متعدد چوری کی موٹر سائیکلوں کے ساتھ گرفتار کیا ہے جبکہ گروہ کے دو ارکان موقع سے فرار ہوگئے ہیں۔

انہوں نے بتایا کہ ایس ایس پی سہارنپور دنیش کمار کی ہدایت پر چوروں کی گرفتاری کے لئے چلائی جارہی مہم کے تحت ایس پی دیہات ودیا ساگر مشر کی قیادت میں تھانہ فتح پور پولیس نے دو شاطر گاڑی چور مکرم ولد گلفام، عرفان ولد عثمان کو بہٹ کے فتح پور روڈ پر بند پڑے فارم ہاؤس سے رات کے وقت گرفتار کیا ہے۔

جن کے پاس سے پولیس نے دو کاریں اور 9موٹر سائیکلیں برآمد کی ہیں، جب کہ موقع سے ان کے دو دیگر ساتھی فرار ہونے میں کامیاب ہوگئے جن کی گرفتاری کی کوششیں کی جارہی ہیں۔

اس گینگ کے یہ ارکان اپنے ساتھیوں کے ساتھ مل کر سہارنپور ضلع میں ہی نہیں بلکہ دوسرے اضلاع میں بھی گاڑیاں چوری کرکے ان کی نمبر پلیٹ بدل کر سستی قیمتوں میں فروخت کردیا کرتے تھے۔

انہوں نے بتایاکہ اس گروہ کو گرفتار کرنے کے لئے پولیس ان کے پیچھے کافی دنوں سے لگی ہوئی تھی، گزشتہ رات پولیس کو یہ کامیابی ملی ہے۔