اترپردیش میں راجیہ سبھا انتخابات کے لیے پرچہ نامزدگی داخل

ریاست اترپردیش کی دس نشستوں پر ہونے والے راجیہ سبھا انتخابات کے لئے بی جے پی کے آٹھ امیدواروں نے پرچہ نامزدگی داخل کی ہے۔

وزیر اعلی یوگی آدتیہ ناتھ ، نائب وزیراعلیٰ ڈاکٹر دنیش شرما ، بی جے پی کے ریاستی صدر سواتنترا دیو سنگھ سمیت بہت سارے سینئر رہنماؤں کی موجودگی میں ، امیدواروں نے نامزدگی کے عمل کے آخری دن راجیہ سبھا کی آٹھ نشستوں کے لئے اپنے کاغذات جمع کروائے۔

پرکاش بجاج نے بھی آزاد امیدوار کے طور پر پرچہ نامزدگی وارنسی سے داخل کیا ہے۔

خاص بات یہ ہے کہ آزاد امیدوار کی حیثیت سے کاغذات نامزدگی داخل کرنے والے پرکاش بجاج نے اس پورے انتخاب کو دلچسپ بنا دیا ہے۔

دس نشستوں پر انتخابات جاری ہیں اور 11 امیدواروں نے کاغذات نامزدگی جمع کرائے ہیں۔

اس سے قبل ایس پی اور بی ایس پی میں سے ایک ایک امیدوار نے کاغذات نامزدگی داخل کر دیئے ہیں۔

اگر کوئی امیدوار اپنا نام واپس نہیں لیتا ہے تو ووٹنگ ہوگی۔

اگر آزاد امیدوار پرکاش بجاج انتخابی میدان میں رہتے ہیں تو انتخابات کافی دلچسپ ہوگا ، کیونکہ آزاد امیدوار کی اپنی طاقت نہیں ہے۔

دوسری جماعتوں کے ارکان اسمبلی کی جانب سے ان کی حمایت کی جائے گی، تاہم یہ کہنا مشکل ہے کس پارٹی کی انہیں حمایت حاصل ہوگی۔

ہردیپ سنگھ پوری ، قومی جنرل سکریٹری ارون سنگھ ، سابق وزیر اعظم چندرشیکھر کے بیٹے ، نیرج شیکھر ، ہریدوار دبے ، گیتا شکیہ ، بی ایل ورما ، برج لال ، سیما دیویدی نے بی جے پی کی جانب سے پرچہ نامزدگی داخل کیا ہے۔

آئندہ ماہ 2 نومبر 2020 کو نام واپس لینے کی آخری تاریخ ہے۔

اگر ووٹنگ کی صورتحال پیدا ہوجاتی ہے تو ووٹنگ 9 نومبر کو ہوگی اور اس کا نتیجہ 11 کو آئے گا۔