Jamaat E Ulema Hin ٹرین میں فائرنگ کرنے والے شخص کے خلاف سخت سزا کا مطالبہ

مظفر نگر کے جمعیت علمائے ہند کے ریاستی سیکرٹری قاری ذاکر حسین نے کہا کہ یہ بہت ہی افسوسناک واقعہ ہے. اس سے اندازہ ہوتا ہے کہ ملک کس راہ پہ جا رہا ہے۔ انہوں نے ٹرین میں فائرنگ کرنے والے شخص کے خلاف سخت سزا کا مطالبہ کیا۔

مظفر نگر:ملک میں مسلمانوں کی سب سے بڑی تنظیم جمعیت علمائے ہند نے جیپور سے ممبئی جا رہی ایکسپریس ٹرین کے اندر تعینات سی آر پی ایف کانسٹیبل کے ذریعہ مسلم مسافروں کا قتل کیے جانے پر سخت رد عمل ظاہر کیا۔ مظفر نگر کے جمعیت علمائے ہند کے ریاستی سیکرٹری قاری ذاکر حسین نے کہا کہ جو محافظ تھا، جسے مسافروں کی حفاظت کے لیے ٹین میں تعینات کیا گیا تھا، وہ قاتل بن گیا۔ قاتل نے نام معلوم کر کے مذہبی شناخت کی بنیاد پر نعرہ لگا کر کہا کہ آپ کو اگر رہنا ہے تو آپ کو یہ یہ فلاں کام کرنے ہوں گے۔ فلاں کو آپ کو قبول کرنا پڑے گا۔ یہ عجیب بات ہے۔ بہت افسوسناک بات ہے اور اس سے اندازہ ہوتا ہے کہ سرکاری پشت پناہی میں زہر گھولا جارہا ہے۔

انہوں نے کہا کہ اس سے اندازہ ہوتا ہے کہ دیش کے اندر جو نفرتیں پھیلائی جا رہیں ہیں وہ کتنی جڑے پکڑ چکی ہیں اور اس کے اثرات کہاں تک پہنچ چکے ہیں۔ اس سے ملک کو نقصان ہو رہا ہے۔ ملک کی ترقی رک سکتی ہے۔ عام لوگوں کو نقصان کا سامنا کرنا پڑ رہا ہے۔ ان کا کہنا ہے کہ ٹرین میں فائرنگ کی واردات میں ملوث شخص کے خلاف سخت کارروائی ہونی چاہئے تاکہ دوسروں کو اس سے سبق حاصل ہو سکے۔