بلندشہر میں نابالغ بچی کے ساتھ اجتماعی ریپ، 4 گرفتار

ریاست اُترپردیش کے ضلع بلند شہر میں 15 سالہ بچی کو جبراً قید کرکے تین نابالغ لڑکوں نے اجتماعی جنسی زیادتی کا نشانہ بنایا۔

پولیس کے مطابق یہ واقعہ چار روز قبل پیش آیا تھا اور کہا جاتا ہے کہ ملزمین متاثرہ کے لواحقین ہیں جنھوں نے اس گھناؤنے جرم کو انجام دیا ہے اور اس کی ویڈیو کو بڑے ہی دیدہ دلیری کے ساتھ سوشل میڈیا پلیٹ فارمز پر اپ لوڈ بھی کر دیا۔

پولیس کے مطابق ضلع کے پہاسو علاقے میں 15 سالہ لڑکی سبزیاں لینے کھیت گئی تھی جہاں سے ان نابالغ لڑکوں نے اسے جبراً اغوا کرلیا اور اس کے ساتھ اجتماعی عصمت دری کی۔

بلندشہر کے سینئیر سپرنٹنڈنٹ پولیس (ایس ایس پی) ایس کے سنگھ نے صحافیوں کو بتایا کہ 'پولیس نے اس سلسلے میں نابالغ بچوں کو گرفتار کر لیا ہے۔'

انہوں نے بتایا کہ 'چوتھے ملزم کو بھی گرفتار کر لیا گیا ہے جس نے انٹرنیٹ پر ویڈیو پوسٹ کی تھی۔'

پولیس نے بتایا کہ 'یہ گرفتاری متاثرہ کے چچا کی پولیس میں مقدمہ درج کرنے کے دو گھنٹے بعد کر لی گئی۔'

ایس ایس پی نے بتایا کہ 'یہ واقعہ 3 دسمبر کو پیش آیا تھا، لیکن بچی تین دن خاموش رہی۔ سوشل میڈیا پر اس کی ویڈیو وائرل ہونے کے بعد ہی متاثرہ نے اس کا اظہار کیا۔'

دہلی کے صفدرجنگ ہسپتال میں اناؤ ریپ کیس کے متاثرہ کی موت کے کچھ گھنٹوں بعد ہی اس واقعہ کی اطلاح موصول ہوئی۔